Fury-a'n heavyweight title a hum

Nimin zing khan khawvelin boxing hmuhnawm a en a, inhnek ngaihven hlawh takah Tyson Fury chuan WBC world heavyweight title a kawl lai humhim turin Derek Chisora a hneh.

Tottenham Hotspur Stadium-an entu mipui 59,769 an pungkhawm a, hneh loh nei loa kaltluang Fury hian amah ang bawka British boxer hi a hneh a, boxing a luhchilh hnuah inhnek vawi 34 hmachhawn tawhin ṭum 33 a chak a, vawi khat chu a khingpui nen an inhnehtawk.

Kum 34 mi Fury te inhnek hi a hmunah Oleksandr Usyk chuan a lo en. Usyk hi IBF, IBO, WBO leh WBA title kawl mektu a ni a, ani nen hian inhnek hmuhnawm leh ngaihven hlawh bik an la chhawp chhuak leh tura ngaih a ni.

Fury chuan, "Usyk, ka hmabak chu nangmah kha i ni. Tun hmain Ukranian boxer Wladimir Klitschko ka hmachawn tawh, a dawt lehah nangmah i ni ang," tiin a sawi a, a boruak sang nghal hle.

Chak lo Chisora tan boxing huanga vawi 13 a tlawmna a ni a, atan chak loh hi thil thar a ni hran lo, vawi 46 inhnek a hmachhawn tawh zingah, tun hnai bikah inhnek hnuhnung pangah vawi li an tlawm, a ṭhat lai a ni tawh lo tih a chiang.