Van Gaal enkawl Dutch team an tlang
Netherlands chuan football thiam ram an nihna an pho lang a, inkhel hmuhnawm chhawp chhuak chungin USA 3-1 in an hneh. Louis van Gaal-a enkawl Dutch team hian Argentina an hmachhawn leh ang.
Denzel Dumfries-a'n Memphis Depay leh Daley Blind te khung tur a siamsak bakah, hun tawp dawn lam boruak san laiin Inter Milan wingback hian an chak nemnghehna goal a khung bawk.
Van Gaal hoin an kal
World Cup 2014-ah khan Van Gaal hoin Netherlands hian semifinal an thleng tawh, kuminah pawh champion tura rinkai zinga sawi lansarh ni lo mah se, tun hnaia an khelh dan thlir chuan an thleng sang hi a mak lo.
Euro 2020 khelh lai ang bawkin Dumfries chu hmanraw pawimawh a ni. Inter Milan duhlai hian tawih zeta a cut back chu Depay tana khung nuam tawk chiah a ni a, an goal khatna a siamsak ang deuh chiah hian Blind khung tur pawh a siamsak bawk.
Virgil van Dijk leh Nathan Ake te tlarhnung laiah an rintlak a, a sir lamah Blind leh Dumfries an hmuhnawm takzet bawk. Midfield thunun thei Frenkie de Jong an neih bakah, an hmatawng Depay leh Cody Gakpo te hi thlen san pui tham an ni.
Coach a lungawi
Netherlands coach Van Gaal chuan, "Inkhelh ṭan hmain Dumfries-a hna thawh tur kha chiang takin ka hrilh a, danglamna thlentu a ni dawn tih ka hriat bakah duhsakna ka hlan, khelmual chhunga a thil tih chu inhrilh nawn a ngai lo," tiin a defender a fak.
World Cup khelh laia goal thum khung tawh, a lu bakah kei ding leh vei lam hmanga goal khung tawh Cody Gakpo pawh a lungawi. Gakpo chuan, "Tun tournament chhung ngei hian nasa takin hma kan sawn.
"Mahni tan chauh ni loin midang tan kan khel hlawm a, chu chuan rah ṭha a rawn chhuah," tiin a sawi. Manchester City defender Ake pawhin, anmahni ringhlel tute chu chhanna an pek zel tur thu a sawi ve bawk a, beisei an nei sang ta hle.
Pulisic khung loh kha
Netherlands ṭhat zia kan sawi rualin USA an vanduai ve bawk. Inkhel tir lamah Christian Pulisic-a'n hun ṭha bik a nei a, keeper Andries Noppert chauh a hmachhawn tawhah goal a khung tlat lo, lut ni se boruak a danglam thei ang.
Timothy Weah-a shot ṭha bik chu Noppert bawkin a lo dang, hun tawp dawna Pulisic siamsak Tyler Adams khung a mawi a, vanneih goal tia sawi theih a ni bawk, goal dang erawh an sual chhuak thei tawh lo.
US hi team ṭha pangngai tak an ni, mahse tlarhnung sir vei lam phui lo an tuar a, an harhchhuah meuh chuan a tlai lutuk tawh. Tunah chuan Canada leh Mexico te nena an inthlen ṭawm tur World Cup 2026 atan an inbuatsaih chhunzawm a ngai tawh ang.
Player inlante
Holland (3-4-1-2): Noppert; Timber, Van Dijk, Ake (De Ligt 90'); Dumfries, De Roon (Bergwijn 45'), De Jong, Blind; Klaassen (Koopmeiners 45'); Gakpo (Weghorst 90'), Depay (Simons 82').
Manager: Louis van Gaal
USA (4-3-3): Turner; Dest, Zimmerman, Ream, Robinson; Musah, Adams, McKennie (Wright 6'); Ferreira (Reyna 45'), Weah (Aaronson 66'), Pulisic.
Last 16 Fixtures & Results
December 3, Inrinni
Netherlands 3 - 1 USA
NED: Memphis Depay 10'; Daley Blind 45+1'; Denzel Dumfries 81'
USA: Haji Wright 76'
Argentina 2 - 1 Australia
ARG: Lionel Messi 35'; Julian Alvarez 57'
AUS: Enzo Fernandez 77' (OG)
December 4, Pathianni
Results kan hre hman lo
France 08:30 PM Poland
England 12:30 AM Senegal
December 5, Thawhṭanni
Japan 08:30 PM Croatia
Brazil 12:30 AM South Korea
December 6, Thawhlehni
Morocco 08:30 PM Spain
Portugal 12:30 AM Switzerland