Jerry leh Chhara ten goal an khung

Zirtawpni zan khan Kalinga Stadium-ah Odisha FC-in NorthEast United an mikhual a, Mizo tlangval Jerry Mawihmingthanga leh Rochharzela ten goal an khung a, Jerry telna Odisha 2-1 in an chak.

Odisha-in bul a ṭan ṭha zawk a, minute 24-naah Nanda Kumar hmangin an khung. Mualneitu team hian goal khung tur hian ball an inpe kual hnem a, Northeast United tlarhnung an ṭhiat nalh hle.

Second half-ah Rochharzela'n NorthEast United beiseina a siam a, minute 60-naah Chhinga Veng tlangval hian veilam aṭanga Joe Zoherliana hnen aṭanga a ball hmuh chu vawi khatah pet nghal pawpin a goal mawi hle.

Mizo tlangval lansarh zanah Jerry Mawihmingthanga'n a tawp a khar ṭha a, Saul Crespo ball pet chu keeper Arindam Bhattacharya-a'n save mah se a per chu minute 78-naah Jerry-a'n chakna goal khung nan a hmang.