Aizawl FC leh Churchill Brothers an inhnehtawk

Zirtawpni zan khan Tilak Maidan, Goa-ah Churchill Brothers leh Aizawl FC te an inkhel a, 1-1 in an inhnehtawk. Mualneitu tan hian Aizawl FC striker hlui Kamo Stephane Bayi chuan minute lina lekah goal hmahruai a khung a, Mizo club tan Henry Kisekka-a'n second half-ah siphurh a sut.

Churchill Brothers tan Mizo tlangval Lalkhawpuimawia leh Lalawmpuia Sailo ten bul an ṭan. Aizawl FC player Eisuke Mohri lakah Om Om-a'n freekick a hlawh chhuak a, Om Om-a hian freekick hi pet zuiin 'far post' lamah a vawrh a, Ponif Vaz chuan tauh letin Kamo-a'n goal ruakah a khung.

Mizo club-in MS Dawngliana hmangin siphurh sutna remchang an nei a, Dawngtea hian goal-ah ṭha takin pet mah se Albino Gomes-a'n a dang ṭha hle. Churchill goalkeeper Albino leh striker Kamo te hi I League-a Aizawl FC champion puitute kha an ni.

Churchill tan hian Kamo che ṭha mah se goal dang a khung belh lo. Minute 75-naah Zodingliana Ralte chuan vei lam aṭangin ṭha zetin a cross a, Henry Kisekka-a'n Aizawl FC tana a goal khatna a khung. Goal dang a luh belh tawh lo a, 1-1 in an inhnehtawk.