Mittui nen Uruguay an liam ta
World Cup champion hmasa ber, khawvel huap football inelna liana vawi hnih champion tawh Uruguay chu last 16 lut phak loin an tla. South American ram hian Ghana 2-0 in hneh mah se, inkhel dangah South Korea an chak avangin an tlang phak lo.
Group H inkhel dangah Korea chuan, hun tawp dawna Hwang Hee-Chan goal hmangin Portugal 2-1 in an hneh. Uruguay leh Korea te hian match thum aṭangin point li ve ve an hmu, an goal difference pawh 0 ve ve a ni.
Team pahnih an intluk tawk viau a, tehna hmasa pahnihah an intluk avangin goal khung hnem zawk en a ngai. Match thum aṭangin South Korea lamin goal li an khung a, goal hnih khungtu Uruguay aiin an dinhmun a ṭha ta zawk.
Thawnthu hlui
Kum 12 liamta khan Uruguay leh Ghana te hi an lo intawng tawh, inkhel boruak sang takah Suarez-a'n an lama goal lut tur a kutin a dang a, penalty chawiin amah hi hnawh chhuah a ni bawk.
Mahse, penalty hi Ghana lamin an hlah, penalty shootout hmanga chak zawk zawn niin African ram hi an tla zui. Tun ṭum an inkhelh turah he thawnthu hi sawi nawn a ni, striker Suarez chuan ngaihdam a dil loh tur thu a sawi a nih kha.
Zirtawpni zanah an intawng zui a, a tir lamah Ghana tan Andre Ayew chuan penalty a hlah. Suarez a khel ṭha a, goal khung chiah lo mah se Giorgio de Arrascaeta-a goal hnih khung zinga pakhat zawk chu a siamsak a ni, an mamawh ang ngeiin point thum an hmu.
A la zo lo
Inkhel dangah South Korea 2-1 in an chak tih an hre tawh, hetih lai hian Uruguay lamin minute ruk khelh hmabak an la nei thung, goal khat khung belhin 3-0 in chak hlauh se la chuan goal difference 1 ni chungin an tlang thei ang.
Mahse, Uruguay hian goal an khung thei lo, hun tawp dawnah Edinson Cavani chuan penalty hlawh chhuakah a inngai a, mahse pek a ni lo. Goal an neih belh tak loh avangin Suarez leh Cavani te awmna ram an tla.
Khelmual dang aṭangin Korea chuan Uruguay inkhel hi phone kaltlangin an lo en. Korea captain Son Heung-min chuan, "Minute ruk ka hriat tawha rei ber a la ni," tiin a sawi hial a, an result bakah Uruguay inkhel result chu an ngaihchan tel a ngaih vang a ni.
Uruguay an lawm lo
Inkhelh banah Suarez-a'n a muttui a dang zo lo, khelmual an chhauhsan dawnin Cavani chuan VAR monitor hunna chu a nem tlu bawk, he thil hi ngaihtuah a nih tur thu thuneitu lam chuan an puang zui ve nghal bawk - penalty an pek loh vanga thinur an ni.
Suarez chuan, "Cavani leh Darwin Nunez te khan penalty an hlawh chhuak ngei tur a ni, a nihna tak sawi chuan FIFA hi Uruguay lamah a ṭang ngai lo. Inkhelh ban kha ka chhungte bula kal a, thu lawmawm sawi ve pawh ka chak.
"Mahse, he hun duhawm thleng tur hi thutlukna dik lo vangin laksak kan ni," tiin penalty an hlawh chhuak lo chu a thinur hle. Ghana erawh an chak loh avangin an tlak a ngai a, an ram tana pawi lo khawih tawh Suarez leh a ṭhiante tla ve kha pawi an ti hran lo ang.