Messi-a match 1000 zanah Argentina an chak

Lionel Messi-a'n Argentina tan goal a khung a, world champion vawi hnih ni tawh La Albiceleste hi Australia lakah 2-1 a hnehin chanpuiin World Cup quarterfinal an lut.

December 9, Zirtawpni zan dar 12:30-ah Netherlands nen semifinal luh inchuhin an inkhel leh dawn, captain Messi-a football zinkawng ti famkim turin Argentina hian match thum chak an la hmabak.

Messi leh goal
Ahmad bin Ali Stadium-a inkhelah mipui lamin Lionel Messi hming an lam ri dual dual a, an thawm chu ring tak a ni. Argentina hi fans lam beisei angin an goal nawr erawh a na nghal lo, goal khung theihna remchang insiam an harsat.

Chawlhlawk hma deuhin mipui lamin an duh an hmu, mual sir lam aṭangin Messi-a'n freekick a pet a, ball per hi anmahni lam bawkin an chang. Box chhunga awm Nicolas Otamendi chuan a lo dang per keuh a, ball per dawngtu Messi chuan defender kap kar aṭangin a khung.

World Cup knockout stage china a goal hmasa ber niin, khung belh ngei a tum ang. Goal a khung bakah a nawr kawngah Messi hian a thawh hlawk, bench aṭanga lut Lautaro Martínez tan ball ṭha bik siamsak mah se Inter Milan striker hian a hlah.

Lionel Scaloni-a'n striker Martinez aia Julian Alvarez a thlan chhan kan hmu. Kum 22 mi Alvarez hi a che rangin a tlan tam a, kum 35 mi Messi tana hna thawhsaktu pawimawh a ni, a tlan tam leh chet ran vangin goal a khung bawk - goal khung turin laklawh a nei miah lo.

Duhthusam lo lai
Argentina hian match hmasa berah Saudi Arabia an hneh lo, a hnuah erawh Mexico leh Poland te 2-0 ve ve in an hneh, inkhel an thunun viau bawk. Australia lakah pawh si hnih faia chak thei tura ngaih an ni hman, a tawpah erawh goal dang an chhuah belh lo kha an vannei.

Otamendi leh Cristian Romero te an nghing leh zauh ṭhin, hun tawp dawna rawn lut Lisandro Martinez-a'n an lama lut tur a dan hram te kha South American ram vanneihna a ni a, Craig Goodwin-a pet Enzo Fernandez-a'n anmahni lama a tih luh hnuah phei chuan an chiai.

Australian wingback Aziz Behich-a'n defender pahnih a tlan pel a, remchang nei mah se keeper Emiliano Martínez a paltlang thei lo. Aston Villa si ban nghaktu hian hun tawp dawnah Garang Kuol khung tur pawh a dansak hram.

Goal khung chu an thei mai, thleng sang tak tak tur erawh chuan Argentina tlarhnung an ngheh zual a la ngai. Copa America an champion ṭuma midfielder rinrawl Rodrigo De Paul pawhin tlarhnung tha ti chak zual tura a beih nasat a ngai bawk.

Beiseina chu
Argentina hian tun hmain World Cup nomawi vawi hnih an chawi tawh, an chmpion hnuhnung zawk chu 1986 kha niin player ropui bik Diego Maradona hoin hlawhtlinna an chang a nih kha, an champion ṭum hian final kalkawngah England an hneh.

Maradona kha mi bik a ni a, a goal khung phakhat phei chu tun thlengin 'Hand of God' tia sawi a la ni. England leh Argentina inkhelh ṭuma inlan zinga mi, English striker Gary Lineker chuan, "1986 kuma Argentina team kha min hriatchhuah tir.

"Maradona khan thil mak a ti thei a, an mamawh hunah a rawn inlar ṭhin avangin hmachhawn an harsa hle. Tunah Messi a awm ve leh thung, an pahnih hian ke vei lam hmang thiam ve ve an la ni zui. An hunlai a inang lo, mahse an hmuhnawm ve ve," tiin tun hma thil leh tunlai thil thleng mek a khaikhin.

Argentina hian Brazil hnehin Copa America nomawi an chawi tawh a, an duhthusam erawh a la thleng kim lo. Messi ho ngeia World Cup champion nih an tum a, chumi atan chuan kawng erawh a la hautak dawn - Netherlands an hmachhawn tur hi fiahna tak tak a ni chauh ang.

Messi leh Mellung
Argentina captain Lionel Messi-a'n ram leh club tana match a khelh zat chu 1000 a tling ta, hetih chhung hian goal goal 789 a khung tawh, a ṭhiante khung tur vawi 348 a siamsak bawk - an ram tan bik goal 94 nei tawhin, ani aia khung hnem an awm lo.

Messi hi kum 35 mi a ni tawh, a football hun hnuhnung a hmang mek. Qatar World Cup a zawh meuh hi chuan Argentina tan a inlan a rinawm tawh loh a, club tan pawh hun rei a inkhelh a rinawm tawh loh bawk.

Qatar World Cup khelh laiah goal thum a khung tawh a, goal khung hnem zinga mi a ni mek. Messi chuan, "Thil thar danglam tak ka tawng leh ta hi ka lawm, hei chu mimal thil ni loin team thawhrah vanga thleng ka ni," tiin a sawi.

Paris Saint Germain forward chuan sawi zawmin, "Khatiang taka thlawpna ṭha kha kan dawng ang tih ka beisei phak lo hial zawk. Anni kha kan chakna thahrui an ni a, anni ho nena hlimna leh lawmna kan tawngza thei kha a nuam takzet," a ti.

Goal khungtu a nih bakah a siamsaktu leh ball sem kualtu a la ni thei a, English defender ropui Rio Ferdinand chuan hei hi a lo hmuhhmaih lo. Ferdinand chuan, "Kumin World Cup kan en chinah chuan mimala khel ṭha ber a ni chiang.

"Tun ang taka hmuhnawm leh ṭha hi ka la hmu tam lo," a ti. England captain hlui Alan Shearer pawhin a hmun ngeia Lionel Messi inkhel lai a en thei chu vannei a intih thu a sawi ve bawk.