Chenna ngai loh ramah Chhinga Veng

Chhinga Veng FC-in a vawi khat nan Mizoram Premier League final an thleng.

Chhing­cows hian MPL6 final thleng turin Ningani zan khan Chan­mari FC 3-1 in an hneh a, nomawi chawi turin match khat chak chiah an hmabak ta.

December 4, Thawhṭan zanah Mizoram Police leh Aizawl FC ten semifinal second leg an khel ve leh ang a, final hi December 8, Zirtawpni zanah Lammuala khelh tur a ni.

Inkhel hmasa

Chhinga Veng FC-in tun season chhungin Chanmari FC vawi li an hneh tawh a, semifinal-ah pawh rinkai zawk an ni. Amaherawhchu, knockout stage-ah erawh Chanmari an chefuh hmasa zawk a, MC Malsawmzuala penalty hmangin first leg hun chanve hma lamah goal an khung.

Second half-ah Chhing­cows-in thapui an chhuah a, goal khung an harsat nachungin Chanmari mid­fielder Joseph Lalfakzuala'n an lama a tihluh zarah si­phurh an sut hram. Inkhelh banah Chhingcows coach Lal­­sangzuala Hmar-in chak an phu tih uar takin sawi mah se Chhinga Veng ṭantute ngaih ṭha takin an awm thei tawh lo.

Coach thutlukna

Inelna a san ang zelin coach hlutna a sang a, MPL semifinal-ah pawh coach thutluknain ngaihven a hlawh takzet. Chanmari FC coach H. Vanlalthlanga'n inhliam vanga first leg khel thei lo Rochhingpuia chu bul ṭantu zingah a dah a, midfielder hmun ruak kiantu hi striker Jakob Vanlalhlimpuia a ni a, MPL champion lai an fimkhur tih a lang chiang.

Chhinga Veng coach Lal­sangzuala Hmar-in thu­tlukna sawi hlawh a siam thung- bul ṭantu zingah a player langsar pathum Malsawm­fela, MS Dawngliana leh Lal­­dampuia te an tel lo vek. Amaherawhchu pla­yer ṭha pathum thlak nan Lalkhawpuimawia (Mapuia), Laldingngheta leh Vanlallawma-te la chhawr thei a, an squad a chhah ṭha tih hai rual a ni lo.

Inngam tawk

Chanmari winger Van­lalbiaa Chhangte ball pet chu goalline aṭang­in Chhingcows captain Lalrinchhana To­chhawng-in a dang nghal a, Chhinga Veng midfielder R. Malsawmtluanga cross chu Kelkang tlangval Mapuia'n a tauh phei a, goal banin Chanmari FC a chhan rih. Heng hun ṭha pahnih hi ṭan aṭanga minute 10 chhung leka thleng a ni a, entu mipui ṭhahnem takin Lammual an pan sual lo.

Chanmari tlarhnungin

ṭum hnih ṭul lo taka freekick an chawi avangin midfielder MS-a'n a club hlui hi a hrem. Chhingcows midfielder MS-a hian freekick hmasa zawk pet goal lo mah se vawi hnihna erawh goal kilah a pet lut a, wall-a ding Chanmari player an zuang miah lo; minute 19-naah 1-0 a ni.

Chhinga Vengin din­hmun an sawhnghet thei lo a, an keeper Zothanmawia'n Ṭhasiama goal khung tur ṭha takin a dang a; amaherawhchu minute 36-naa MC Malsawmzuala goal class lutuk erawh dan rual a ni lo. Siaha tlangval MC-a hian phase 2 aṭangin Chanmari zawm chauh mah se goal nga a khung hman a, MPL champion lai tana beiseina siamtu a ni.

Player ṭha nge nge

Second half-ah goal a lut lawk lo a, penalty shootout an hnaih hret hret. Chhingcows boss-in Chanmari tlarhnung chauh tawh lamah bench lama a dah ṭhat Sawmfela, Dawngtea leh Dampuia-te a luhtir a, heng player pathum hi inkhel thlak danglamtute an ni.

Minute nga chiah a awm tawh tihin vei lam aṭanga Dampuia ball vawrhluh ṭha tak chu vengtu nei lo Chhingcows defender K. Lalthlahlova'n (Patea) a tauh lut a, Chhinga Veng mipui thawm a ring hle.

Final luh nemngheh nan minute thum hnuah Dawngtea pass chu Sawmfela'n penalty hlawh chhuah nan hmangin Ramhlun South tlangval hian penalty spot aṭangin round 7 hnua a goal hmasa ber a khung.

Chhinga Veng hian Lal­rammuanpuia hmangin goal lina an khungah an inngai hman a, amaherawhchu Dawngtea pass ṭha bik changtu Patea a offside hman.

Armed South tlangval Apuia vanneih zan a ni lo a, first half-ah crossbar a pet per bawk. Chanmari substitute Jakob-a'n hun tawpah chance ṭha a hlah a, 3-1 in inkhel a tawp zui a, result-in team ṭha zawk a sawifiah.

Chhinga Veng kum ṭha

MFA hnuaia club inelna lian MFA Super Cup leh I Day Football-ah an champion tawh a, an junior team-in MPL Under 18 nomawi an chawi tawh. He chauh hi a ni lo, football hmanga veng leh veng inelna NECS Cup-ah Chhinga Veng LC team an champion tawh bawk.

Amaherawhchu, Chhinga Veng nomawi dah ṭhatnaah kim lo a awm a, Mizoram chhung football hmanga inelnaa nomawi zawnga hlu ber Mizoram Premier League nomawi a la tel lo.

Sea­son liam taa Chanmari FC champion puitu Lalsang-zuala Hmar hmabakah final chiah a awm tawh a, Sanga hi coach zinga MPL nomawi vawi hnih chawi thei hmasa ber leh club pahnih champion pui thei hmasa ber ni turin a dinhmun a ṭha ta hle.

ZoFooty Statistics
1st Leg : November 24, Zirtawpni
Chhinga Veng FC 1 - 1 Chanmari FC
CVFC : Joseph Lalfakzuala 77' (OG)
CFC : MC Malsawmzuala 45' (P)
MoM : F. Lalmuanawma, CFC
2nd Leg : November 30, Ningani
Chanmari FC 1-3 Chhinga Veng FC (FT)
CFC : MC Malsawmzuala 36'
CVFC : R. Malsawmtluanga 19'; K. Lalthlahlova 85';
Malsawmfela 88' (P)
MoM : R. Malsawmtluanga (CVFC)
48% Ball Possession 52%
15 Shots 21
6 On Target 8
1 Yellow Card 0
0 Red Card 0
Agg-ah Chhinga Veng 4-2 in an chak
Powered by Rainbow Multibrand Mobile Showroom