ISL - Goa-ah goal a lut hnem

Ningani zan Indian Super League inkhelah red card, penalty, team inngam tawk leh goal tam tak hmuh turin a awm a, FC Goa chuan an mikhual Bengaluru FC chu 4-3 in an hneh hram.

Jawaharlal Nehru Stadium, Fatorda-a inkhelah hian Espanyol forward hlui Ferran Corominas chu player langsar a ni a, Goan club tan hattrick a siam–tun season ISL inkhel hmuhnawm bera chhal ngamah Mizo hmel hmuh tur erawh a awm lo.

Inkhel chu

Bengaluru-in an match hmasa pahnihah hnehna an chan tawh avangin inringtawk takin FC Goa khelmual an lenglut a, an beisei ang erawhin game a awlsam lo. Minute 16-na lekah Goa lamin goal hmahruai an khung nghal a, Corominas khung a ni. Bengaluru tan minute nga hnuah an striker chhuanvawr Miku chuan an si phurh a sut ve lehnghal mai a, an hlim chhung erawh a rei lo.

Minute 33-naah Corominas bawkin an goal hnihna a khung a, BFC an talbuai chhunzawm. Bangalore club goalkeeper chhuanvawr Gurpreet Singh Sandhu chu penalty area-a Manuel Lanzarote a tih tluk avangin hnawhchhuah a ni a, penalty a chawi zui bawk–Lanzarote tan goal-a chantir turin harsatna a awm lo.

Bengaluru Harhna

Bangalore club 3-1 a an hnufual hnuah an tlawm mai lo. Huaisen takain an bei chhunzawm a, minute 57-naah Erik Paartalu chuan an si phurh a sut ṭhen. Minute thum a liam a, Venezuela international Miku bawk inlar lehin an si phurh a sut zo.

Bengaluru hlimin an lam a, mah se an hlim chhungin minute thum aia tam a daih lo. Player kim loa khel zawk an nih miau avangin Goa nawrlet an dawl lo a, Corominas chuan a hattrick-na tur leh chakna goal ni turin a khung chhunzawm. Bengaluru-in goal dang an nei tawh lo a, 4-3 in FC Goa an chak.

Inkhel Tur

Zanin dar 8:00-ah inkhel pakhat a awm dawn a, Delhi Dynamos chuan NorthEast United an mikhual dawn. Delhi-ah hian Lunglei rawlthar Lallianzuala Chhangte leh Lalhmangaihsanga Ralte chu player pawimawh an ni a, Highlanders-ah Robert Lalthlamuana chu captain niin Lalrindika Ralte-in hmun pawimawh a chang ṭhin bawk.

Pathianni tlai dar 5:30-ah Lalchhuanmawia Fanai leh Isaac Vanmalsawma te khelhna Pune City chuan Jeje Lalpekhlua leh Jerry Lalrinzuala awmna Chennaiyin an mikhual dawn a, Lalruatthara'n hmun pawimawh a channa hmun Kerala Blasters chuan zan dar 8:00-ah Mumbai City an mikhual bawk ang.

Mimal Lawmman
Swift moment of the match Miku, Bengaluru FC
Winning pass of the match Bruno Pinheiro, FC Goa
Emerging player Mohamed Ali, FC Goa
Fittest player Mandar Rao Dessai, FC Goa
Hero of the match Ferran Corominas, FC Goa