Arsene Wenger-a'n attacking game a beisei ; Man United in bus an park leh dawn em?

Premier League champion nih tum Manchester United chu zanin dar 11:00 hian Arsenal khelmual Emirates Stadium-ah an lenglut dawn. English club ropui zawk nih inchuha inel reng club pahnih inkhel tur hi manager ropui Arsene Wenger leh Jose Mourinho te inbeihna a ni dawn.

Arsenal aiin Manchester United hi point thumin an sang zawk mek a, United hian hnehna an chang a nih chuan an elpui an kalsan dawn bakah Manchester City kal fal lutuk tur an um bawk ang; Gunners hi an chak lo a nih chuan Wenger-a naute tan league nomawi a hla tawh khawp ang.

Bus Park

Arsenal manager Arsene Wenger hi attacking game ngaina mi niin a naute pawh an khingpuite goal a nawr tir ṭhin. United manager Mou­rinho erawh a ngaihdan a dang, khingpuite nawr vak ai chuan mahni goal venhim ṭhata hnehna chan duh mi a ni thung.

Manager pahnihte hi com­petitive match bikah vawi 16 an inhmachhawn tawh a, heng zingah hian Wenger hian vawi khat chiah hnehna a la chang ve, season hmasa khan Emirates Stadium-ah 2-0 in hnehna a chang. Manager pahnih sulhnu en chuan Mourinho hian result a nei ṭha zawk.

Inkhel thlir lawkin Wenger chuan, "Man United hian an khel ṭha tluang a, keini pawh kan boruak ṭhat lai a ni, inkhel hmuhnawm leh ngaihnawn a nih ka ring. Mourinho naute hian min chhaih mangan an tum dawn a, goal venhim aiin a khung lam an tum nat zawk ka ring," tiin a sawi.

United hian Anfield-a Liver­pool an lenchilh ṭumin Mourinho-a'n tlarhnungah player a remkhawm nasa a, a naute a khelhtir dan hian sawisel hlawh viau mah se mikhual tana inkhelh harsatna hmunah point an hmu thei; point an hmuhna tur a nih phawt chuan mipui thlirdan leh sawiselna chu a pawisa leh miah lo ang.

Match 12

Arsenal hian Emirates Sta­dium-ah league match an khelh hnuhnung 12-ah hnehna an chang vek a, tun season chhungin ngam loh an la tawng lo, mikhual tana lenluh chakawm tak a ni lo ang. North London derby-ah Tottenhman an hneh hnuah Burnley leh Huddersfield te an hneh zui avangin an phur vanglai a ni.

Huddersfield an hneh ṭumin Arsenal playmaker Mesut Ozil-a'n goal a khung bakah assist vawi hnih a nei a, goal khungtu striker Alexandre Lacazette leh forward Alexis Sanchez te chu hliam vanga lak chhuah an ni bawk.

Gunners manager Wenger chuan, "Sanchez khan hliam tenau a nei a, chuvanga la chhuak chu ka ni. Danny Welbeck, Olivier Giroud leh Jack Wilshere te kan la neih avang­in tlarhma lamah chuan thlaphanna tur a awm lo, Laca­zette dinhmun chiang lo mah se ka duhthusamah chuan United kan hmachhawn hunah inlan ngei se ka duh hle," tiin a sawi.

Lukaku nge Ibra?

Jose Mouronho-a'n season hmasa khan Zlatan Ibrahimovic a chhawr rim a, Swede striker hi season chawhnu lamah hliam vangin a khel zui thei lo. Nipui bazarah hmatawng tur an zawng a, Everton aṭangin Romelu Lukaku chu pound maktaduai 75 zetin an lalut.

Belgium international Lukaku hian United tana a match hmasa 10-ah goal 11 zet a khung thei a, striker thar chet danah United fan-te an lungawi. Mahse, beisei angin thil a kaltluang reng bik lo, tun hnai a match hnuhnung 10-ah erawh goal khat chiah a khung thei! Lukaku chungchang bikah chuan a bulṭan ṭhat hi a chanve zo tih ngawt theih a ni lo.

Kum 36 mi Ibra­himovic hi a khup hliam a damchiang tawh a, mah se inkhel bulṭan tura rin zawk erawh a la ni lo. Striker palian hian bench aṭangin tun season league match thum a khelhah goal a la khung lo a, Mourinho tan Ibra nge Lukaku zawk inkhel bulṭan tura thlan chhuah tur hriatthiam a harsa mai thei.

Point thum chiah

Chelsea manager hlui Mou­rinho-a'n season hmasa aṭangin Old Trafford-ah hna a thawk ṭan a, a season khatnaah Europa League leh League Cup te chawi mah se Premier League-ah erawh parukna an ni phak hram.

Kum 54 mi Mourinho hian United a enkawl chinah "big six" tia sawi ṭhin - Chelsea, Arsenal, Manchester City, Liverpool leh Tottenham te hi khualmualah a ngam lo hle, a naute hi hnehna a la chanpui miah lo; point thum chiah a la hlawhchhuahpui a, heng inkhelah hian goal khat chiah an khung a ni!

United hian Watford 4-2 a an hneh ṭumin Nemanja Matic chu hliam vanga lakchhuah a ni a, Marouane Fellaini chu hliam vangin a inlan thei lo bawk; midfielder pahnih te hi he thu buatsaih lai thleng hi chuan an dinhmun a la chiang lo. Tlarhnungah Phil Jones leh Eric Bailly te erawh chhawr theih tawh tura beisei an ni thung.