AFC Champions League-ah Aizawl FC
I League champion Aizawl FC chuan AFC Champions League playoff an khel dawn a, Iranian club ṭha Zob Ahan FC chu January 30 khian khualmualah an lenchilh ang - Mizo club hian hnehna an chang a nih chuan Indian club zinga a hmasa ber ni turin Champions League group stage an khel dawn tihna a ni a, an inpetkai zo lo a nih pawhin AFC Cup-ah chuan an inlan tho ang.
Aizawl FC technical director Hmingthana Zadeng chuan, "Iranian club nena kan inhmachhawn tur thu hi AFC aṭangin lehkha kan dawng fel vek tawh. Playoff hi match khat chauh khelh tur a ni a, keini aia ranking sang zawk Iran club hi an mualah kan hmachhawn a ngai dawn a ni," tiin Vanglaini a hrilh a, AFC hmachhawn tur Zob Ahan hi 2010 AFC Champions League-ah khan final an lo thleng tawh.
Champions League hi tun hmain Indian club-ten playoff khel nghal loin preliminary round aṭangin an khel ṭhin a, AFC Club Competitions Ranking aṭangin an khelh ṭan theihna tur teh a ni ṭhin. Tun hnaiah AFC Cup-a Bengaluru an chet ṭhat avang leh FIFA ranking lama India-in hma a sawn avangin AFC club ranking-ah hian India chuan hmun thumin hma a sawn a, Mizo club hian playoff aṭangin an khelh theih phah dawn a ni.