Aizawl FC leh Mizoram Police An inhlau lo

Thawhṭan zana Mi­zoram Premier League final luh inchuh tur Mizoram Police FC leh Aizawl FC-te chu an inhlau lo tawn hle.

Mizoram Police FC coach Lalbiaksanga Colney chuan Aizawl FC laka an goal chhuahnate en lêtin an inzir a, Aizawl FC hmachhawn dan an zir thu a sawi - chak ngei an inbeisei.

Kolkata aṭanga result ṭha nena lo haw hlim Aizawl FC boss Paulo Menezes chuan MPL6 final luh ngei an tum thu a sawi a, Mizoram Police hneh thei tur player an neih thu leh, East Bengal nen an inkhelh ṭuma khel thei lo player ṭhenkhat an dam hman a beisei thu a sawi.

Mizoram Police leh Aizawl FC hi 2-2 in an inhnehtawk mek a, 1980's vela Zoram football-a hming langsar team pa­hnihte kum 2017-ah team hmuhnawm an la ni zel.

December 4 zan dar 7:30-ah team pahnihte an inhmachhawn dawn a, a chak zawkin Chhinga Veng FC chu MPL6 final-ah an bitum ang.