Kolkata Derby East Bengal leh Mohun Bagan an intawng dawn
Pathianni chhun dar 2:00-ah East Bengal leh Mohun Bagan-in Kolkata Derby an khel dawn a, team inhal pahnih inkhel tur hi eng level pawh ni se a boruak a te thei lo.
Salt Lake Stadium-ah mipui sing chuang an pungkhawm dawn tih a chiang tawh a, FIFA World Cup U17 final khelhna hmuna Kolkata Derby en duh mipuiin nimin thleng khan ticket 60,000 chuang an lei tawh niin phai media te chuan an tarlang–inkhel boruak a sang dawn.
Vawiin tlai dar 5:30-ah inkhel a awm dawn bawk a, Mizo rawlthar Samuel Lalmuanpuia captain-na hnuaia khel tur Shillong Lajong chuan Churchill Brothers an mikhual ang.
Champion duh
Mohun Bagan-in an coach Sanjoy Sen hnuaiah I League nomawi chawi leh ngei an duh a, player pawh an thlang fimkhur hle–Calcutta Football League chu in en chhin nan an hmang. CFL-a an player zingah Aizawl FC striker hlui Kamo Stephane Bayi chu chhawr zui zel tlak lohah ngaiin an chhuah zalen a, season hmasaa an captain Katsumi Yusa an chelh lo bawk.
Hetihrual hian Aizawl FC champion-na kawnga player pawimawh Eze Kingsley, Mizo club player hlui tho Ricky Lallawmawma leh Yuta Kinowaki an lalut a, Churchill Brothers aṭangin Ansumana Kromah leh Chesterpoul Lyngdoh an lalut bawk. Shillong Lajong aṭanga an lakluh Aser Pierrick Dipanda hi season hmasaa I League top scorer kha a ni a, Indian football-a mi thar Diogo Ferreira hi Porto youth system chhuak a nih avangin a thiam tih hai rual a ni lo–Mizo tlangval Beikhokhei Beingaichho leh bnuai 200 chuang hlawhtu Sony Norde an la kawl cheu.
EB an nep lo
I League tih hnua la champion lo East Bengal-in champion ngei an duh tawh a, sum pawh an seng huai–I League-a Indian coach awm tawh zinga hlawh hnem ber ni turin Khalid Jamil chu Aizawl FC aṭangin an lalut a, kum khata nuai 60 chuang hlawh coach hian Mizo club-a a hman thiam sa Mahmoud Al Amna Lalramchullova, R. Laldanmawia leh Brandon VL Remdika a chhawm tel bawk.
East Bengal hian anni ho bakah hian Indian football-a hming langsar Nikhil Poojari, Cavin Lobo, Arnab Mondal leh Mohammed Rafique an la kawl bawk a, Katsumi Yusa, Willis Plaza, Eduardo Ferreira leh Charles Souza-te hi inchhuanpui tham an la nih miau bawk avangin East Bengal hmachhawn hi a hautak ang.
Danmawia a dam
Mohun Bagan-in an match hmasa berah Minerva Punjab an lenchilh a, 1-1 in an inhnehtawk. East Bengal-in champion lai Aizawl FC an mikhual ve thung a, an hmelma chak zawh loh hlanin an chak bik lo; 2-2 in an inhnehtawk a, AFC striker William Lalnunfela an ngam lo–team pahnihin a zawna chak zawh loh zawn an duh lo ang.
Hetihlai hian hliam vanga Aizawl FC hmachhawn thei lotu R. Laldanmawia chu a hliam a dam tawh a, Sialhawk Express hian training a zawm leh tawh niin Vanglaini chuan thu a dawng–Pathianni chhunah a inlan a nih pawhin a mak lo ang.
Mizo tlangval
East Bengal-a Mizo awm ten a vawi khat nan I League-ah Kolkata Derby an khel dawn a, an phur tawh hle. Kolkata club defender Lalramchullova chuan, "Champion tur khawpin kan team hi kan ṭha tawk a, inlungrual taka kan khel thei a nih chuan Bagan pawh hi kan hneh ang. Salt Lake ngeia Kolka derby hmachhawn tur kan nih avangin kan phur tawh takzet a ni," tiin Vanglaini a hrilh.
Brandon VL Remdika chuan, "Kolkata derby a nih avangin a boruak pawh a danglam a, ka phur tawh takzet. Inkhel bul ka ṭan dawn leh dawn loh ka la sawi thei lo a, ka inlan a nih erawh chuan theihtawp ka chhuah dawn a ni," tiin Vanglaini a hrilh ve bawk.