Referee-in inkhel titawp thei dawn

FIFA World Cup 2018-ah inkhelh laiin chi inthliarna lam hawia fan-te an khawsa a nih chuan referee ten inkhel tihtawp theihna an neih tur thu FIFA president Gianni Infantino chuan a sawi.

Football khawvela thuneitu sang ber FIFA chuan nipui laia Confederations Cup neih a nih khan referee-te chu enchhin nan he thuneihna hi a lo pe tawh a, he dan hnuaiah hian referee chuan inkhel tihtawp, chawlh lailawk leh inkhelh hma hauha tihtawp theih dan thlengin thuneihna a pe a ni.

Infantino chuan, "Kan dinnaah nghet takin kan ding dawn a, Russia-ah hian inkhel muanawm tak kan neih theih kan beisei tlat a ni. Buaina engmah a chhuah loh nan theihtawp kan chhuah ang," tiin a sawi.

Russia-ah hian chi inthliarna a hluar hle a, Russian club ṭha Zenit St Petersburg tana lo khel tawh Brazil international Hulk chuan inthliarna nasat thu hi ualau takin a lo sawi tawh. Thla hmasa khan Russian club tho Spartak Moscow chu UEFA Youth League-a Liverpool nen an inkhelh ṭumin chi inthliarna lam hawia an chet avangin ticket hralh theih chin neia European match khel turin a lo hrem tawh.