Milan-ah Kaka a kir dawn?

Kaka chuan tun season ral hmain a club hlui AC Milan lamah a kir leh thut mai thei tih thu a sawi chhuak. Kaka hian football a khel zui dawn a nih chuan China lam pawh pan thei a nih thu a sawi bawk.

Kum 35 mi Kaka hian MLS club Orlando City tana a contract a hman zawh hnuah club nei loin a awm mek a, player ni tur kher lo pawhin Milan-ah hian staff zinga tel tur nia sawi a awm mek.

Brazil international hlui Kaka chuan, "Club thuneitute nen inbiakna kan nei a, he club tana tha thawh chhunzawm theitu nih zel chu ka duhdan a ni," a ti. Milan hi Chinese sumdawng hausa kutah a lut tawh a, Kaka hi club thuneitute nen an boruak a ṭha chho a nih chuan China lama a inkhel a nih pawhin a mak lo ang.

Kaka hian San Siro-a a awm chhungin Serie A leh Champions League nomawi a chawi hman a, he mi hnuah Spanish club lian Real Madrid a zawm; La Liga lamah hian hliam a neih fo avangin a inkhel tam tawk lo a, Milan-ah bawk a kir leh a ni.

Serie A vawi 18 champion tawh Milan hian an manager Vincenzo Montella banin a thlak nan Gennaro Gattuso an lalut hlim a, an midfielder hlui Gattuso kaihhruaina hnuaia an match hmasa ber atan Pathianni tlai dar 5:00-ah Benevento an hmachhawn ang.