Mahuma Memorial I Div Run siam thiam Lords an chak

Mahuma Memorial Cricket Tournament nimin inkhelah run 400 chuang vuakchhuah a ni! Zarkawt Lords chuan Gorkha CC chu wicket riatin an hneh a, team pahnih hian run 200 an siam tling ve ve - inkhel a hmuhnawm hle.

Suaka Cricket Ground-a inkhelah Gorkha CC an bat hmasa zawk a, over 40-ah run 202 siama wicket sarih an hloh avangin chak ngei tura ngaih an ni - Gorkha tan opening batsman Rajesh chuan run 54 a vaw chhuak a, player langsar ber erawh ball 64 lek a hmachhawna run 71 siam thei Sameer a ni.

Lords-in hnehna chang turin run 200 chuang vuak chhuah an ngai a, a bul ṭantu chu player tawnhriat nei ngah Lalruatsanga (Atea) leh captain Darremsanga te an ni. Atea hian run 51 ngawt a rawn vaw chhuak a, run 30 siamtu Dara'n a thlawp ṭha viau bawk.

Zarkawt an phur tawlh tawlh - Zahir Uddin chuan ball 79 lek a hmachhawnah run 87 ngawt a rawn vaw chhuak a, a tawp thleng damin over 31.3-ah Lords hian an target an umpha der a, wicket hnih chiah an hloh.

Nimin Inkhel Result
Gorkha: 202/7 (40) bt Zarkawt Lords:203/2 (31.3)
*Wicket riatin Zarkawt an chak

Vawiin Inkhel Tur
09:30 AM Chanmarians CC vs Kulikawn CC