The Normal One Thingtlang tlangval, khawpui lawm hlawh!

Germany Black Forest-a thingtlang khaw te takte Glatten-ah chuan naupang pakhat a awm a, a hming chu Jurgen Klopp a ni. Chu naupang chu German naupang dang ang thoa inkhelh tuipui a ni a, danglam bikna erawh a nei. 

Naupang tam tak chuan ṭhiante nena intihhlim nan football chu an khel satliah ve mai a, mahse chutihlai chuan Klopp erawhin a 'thluak' nen football chu a khel daih tawh thung!

Nia, kum 11 mi lek a nih lai khan Klopp hian football kalphung a man daih tawh a, a ṭhiante nena inkhel chungchang an sawiin 'tactical' deuhin a ni chu a titi thei daih tawh. 

Mainz 05, Borussia Dortmund leh Liverpool-ah a hlawhtling vek a, German thingtlang khaw pakhata naupang ve mai ṭhin kha khawvelin ngaisang takin a en ta. 

Klopp hian a naupan laiin ṭhian kawmngeih tak pakhat a nei a, a hming chu Jens Haas a ni. Haas nen hian SV Glatten youth team tan an khel dun ṭhin a, hetihlaia an club ṭan ber chu Bundesliga club Stuggart a ni. 

Vawi khat chu Haas leh Klopp hi Glatten tana inkhel turin an chhuak dun a, an club ṭan em em Stuggart inkhelh lai a ni - Bundesliga club inkhel hi radio-ah an ngaithla. 

Stuggart khelh danin Klopp a ti lawm lo a, hetihlai kum 11 mi lek Klopp hian substitution siam a ṭul thu leh an khelh dan phung thlak a ngaih thu a ṭhianpa hi a hrilh a, player lut tur thlengin a sawi tel. 

Minute rei loteah radio-a commentator chuan Klopp-a sawi ang chiaha substitution siam a nih thu a rawn sawi a nih chu! Haas chuan, "A hriatna zau dan leh game a hriat dan kha mak ka ti em em a, a chang chuan coach a ni tawh reng ni mai hian ka hre ṭhin," a ti!

Glatten khuaah hian vawiin thlengin mi 3000 pawh tling lo an cheng a, he khua hi Klopp-a seilenna a ni - tun thlengin a nu chu he hmunah hian a la cheng reng a, he khaw mite hi an ngawi chawiin an thawkrim em em thung. 

Klopp hian unau hmeichhia pahnih a nei a, German coach chuan a farnute hi a tan chuan a nu ang mai an nih tel thu a sawi ṭhin - football khawvela hnuk lut bertu erawh a pa Norbert chu a ni a, ani hi thil zuara zin kual ṭhin a nih bakah amateur club tan goalkeeper a ni bawk. 

Glatten Under-11 team coach ṭhin leh Klopp-a coach hmasa ber Ulrich Rath chuan, "Norbert hi Klopp tan chuan mi pawimawh tawpkhawk a ni a, amah chhertu a ni. Norbert hian a tirah chuan football a khel nasa a, a hnuah tennis a khel leh bawk. Jurgen hian a pa ṭawng hmang thiamna te, phurna leh thathona te kha a chhawm tel a ni," a ti.

Klopp-a nu hi Glatten khaw chhuak a ni a, nu ṭawng tam lo tak a ni. Rath chuan, "Chak leh goal khung lawma Klopp-a hlim zuang vel ka hmuh hi chuan a pa ka hre chhuak ṭhin a, in lamah erawh zawi awi taka awmin a nu hlimthla a keng tel leh thung ṭhin," tiin Klopp-a mizia a sawi. 

Glatten thingtlang khua a chhuahsan hnuah Klopp hian amateur club hrang hrang tan a khel kual a, Frankfurt khawpuiah sports science-a degree neih tumin lehkha a zir pah bawk. 

Kum 1990 khan kum 23 mi niin second division team Mainz 05 tan semi-professional contract a ziak a, forward chu a khelhna a ni ṭhin. Hetihlaia Mainz captain Michael Schumacher (Formula 1 legend lo zawk) chuan, "A tlan chakin ball kangah a ṭha em em a, mahse technical lamah a chuti lua lo a ni," tiin a sawi. 

Klopp hi striker thiam tak a ni lo a ni ang - Mainz inkhelh dawna a hming an puan chuan fan-ten an 'boo' khum hluah hluah zel! Schumacher chuan, "Vawi khat chu, 'Engtinnge ka tih chuan ang? Coach-ten min luhtir zel an duh si a,' tiin min zawt. Player ṭha tak a ni lo tih a inhria a, mahse ti tura tih chu thuawih takin a ti mai zel," a ti. 

Wolfgang Frank-a'n Mainz a enkawl hnuah forward ṭhin kha tlarhnung lamah a sawn a, 6ft 4in-a sang Klopp-a theihna tak tak phawrhchhuah a ni thung - a career tawp thlengin Mainz tan a khel a, match 325-ah a inlansak. 

February 2001 khan Mainz hi German third division lama tla mai thei dinhmunah an ding a, hetihlaia club president Harald Strutz chuan huaisen takin thutlukna a siam - inkhelh a chawlhsan thu puangtu Klopp chu coach atan a ruat!

Strutz chuan, "Jurgen Klopp kha football atchilh tlat, mi danglam bik a ni. Game tinah hruaitu a nihzia hmuh turin a awm fo a, fan-te pawhin an ngaina hle. Manager a nih theihna turin thutlukna kan siam a, he club hun tawn ropui ber chu a inṭan nghal a ni," a ti. 

Klopp-a enkawlna hnuaia an match hmasa pasarihah vawi ruk an chak nghal a, relegation zone an chhuahsan - a hnu season hnihah a zawnin league match tawp ber khelh ni thlengin Bundesliga khelh theih an inbeisei a, mahse an vanneih ṭum erawh a ni lo. 

Strutz chuan, "Kha season hnihah khan mi zawng zawng chu kan nguai a, kan mittui a tla. Mahse, fans 15,000 pungkhawm hmaah khan Klopp chuan a hma aia ṭha zawka kan tih leh tur thu a sawi - engtiklai pawhin thusawi tur tak hi a sawi zel a ni," a ti. 

Klopp-a'n a tiam ang ngeiin a season thumnaah Mainz hi Bundesliga khel turin a tlinpui a, an club chanchina German top flight khel tura an tlin vawi khatna a ni. 

Strutz chuan, "Zan hlimawm tak kan hmang a, Jurgen hian khami zana ka awm dan kha a mitthlaah a cham reng thu min hrilh ṭhin. Ni e, zing dar 3-ah khan pub-ah ka la awm a, ka hlim a, ka nui a, duhtawkin in tur ka in bawk a ni," a ti. 

Borussia Dortmund chief executive Hans-Joachim Watzke chuan, "Mainz hian player ṭha an nei ngai lo a, mahse team inlungrual tak an nih avang khan hneh an harsa em em lawi si a ni," tiin Klopp-a hnuaia Mainz dinhmun a sawi. 

Germany mipuiin Klopp an hmelhriat tak tak erawh World Cup 2006-a expert anga TV-a a ṭhut chu a ni a, Watzke chuan, "Germany mipui tan chuan analysis lama sang em em si, hmuhnawm taka sawi thei an hmuhna hmasa a ni a, an ngaina tlat a ni," a ti. 

Klopp-a'n June 2008-ah a club hmangaih em em Mainz chu mittui nen a mangṭha a, tlakchhiat lam pan mek Dortmund chuan an thawhlehna a nih theih beiseiin Klopp an lalut.

Fans 80,000 lenna Westfalenstadoin-ah chuan Klopp chu 'hero' a ni a, 'heavy metal football' tia a sawi hmangin German football-a talbuai mek club kha khawvela club ṭha pawlah a siam a, kum 2011 a herchhuah meuh chuan Bundesliga nomawi a chawipui. 

Watzke chuan, "Team-ah khan phurna thar a siam a, kan khelh dan chu a rawn thlak hlawk a, phurna, tumna leh rilru inpawhna nen kan khel a ni. Fans leh player-te khan a ni khatna aṭangin an ngaina em em a, kan khawpui leh a chhehvel chuan thunun theih loh khawpin amah kha an ngaina a ni," a ti. 

Klopp hian 2011-12 season-ah league leh German Cup nomawi a chawi leh a, DFL Super Cup (2)-ah a champion a, 2012-13 khan Champions League final a hruai thleng bawk.

Klopp-a ṭhianṭha Uli Graf chuan a ṭhianpa pualin 'Kloppo du Popstar' tih hla a phuah a, German charts-ah number 2 a ni phak hial - lar tak a ni! 

Mahse, Uli chuan, "Germany-a pa lar ber pawl a ni a, mahse pop star nih a tum lo. Black Forest tlangval, mipuite 'hero' ni ve ta tih hi a inhre reng a, mipui tana siam a ni," a ti. 

German coach-in ngaihsan a hlawhna pakhat chu a chawr chhuahna hmun leh a nihna a theihnghilh ngai lo hi a ni. Klopp-a ṭhianpa Haas chuan, "Dortmund coach a ni a, mahse ka classmate hlui a nihna chu a theihnghilh phah lo. Kan khua leh a mi chengte min ngaihsak em em reng a ni," a ti. 

Klopp-a coach hmasa ber Rath chuan, "Ka kum 75 tlinnaah min biain, min lawmpui thu a sawi. Kan khaw tlangval a nih hi a theihnghilh ngai lo," tiin a player hlui chu a chhuang hle. 

German coach hian Dortmund a enkawl lai khan khelmualah chauh hlawhtlinna a chhar lo - club sponsor te nen lam dawrtuah a ṭang ṭhin a, hetihlaia Dortmund head of marketing Carsten Cramer chuan, "Sumdawnna lam buaipuitu tan chuan Klopp hi hma theh tura duhthusam a ni. 

"Klopp kha all-rounder a ni a, kawng engkimah min thlawp. Sponsor-te kha amah ngeiin a be ṭhin a, kan inremna an pawtsei leh nge nge ṭhin. Jurgen-te ang kum sarih thawhpuia ngaih miah loh chu thil theih a ni lo," a ti!

German coach hian October 2015 khan Dortmund a chhuahsan hnuah Liverpool a zawm a, English club tan hian Champions League, FIFA Club World Cup leh UEFA Super Cup nomawi a chawi leh der tawh a, Premier League nomawi chawi thei dinhmunah a ding mek bawk. 

Liverpool-a zawm hnua English club danglam takzia inhrilh nawn kan ngai lo - mit ngeia hmutu te kan ni a, a ropuina leh hnathawh chu kan beng ngeiin kan hria a ni.

Sikul ka chawlhsan dawna kan hotupa thusawi kha ka la hre reng ṭhin. "Football-ah chuan hlawhtling ngei ang che, a nih loh chuan thil dangah hma hun i neih ka hre lo a ni," min ti. 

"Khawvel kan hneh dawn a ni," tia au chiam chi ka ni lo a, chutiang lam hawia thil sawi chu ka thiam lo. Mahse, ball erawh kan chang tam tur a ni. 

Pundit tam zawk hi chu footballer ni ṭhin an ni a, sawiselna hrehawmzia an theihnghilh ṭhin a ni. A bik takin Neville unau hi ka sawi duh - a bik takin manager ni tawh zawk hian insawiselna hian min pui lo tih chu a hrethiam ve tur a ni. Mahse, Liverpool player puih chu a chak lo ang tih ka hrethiam. Ani hi manager hna thawk hleithei lo kha a ni a, engtinnge player sawisel tura TV-a kan lantir reng theih zawk le?

Bayern hian Chinese-in industry khawvela hna an thawh dan chu football-ah an thawk a ni. Midang hnathawh ṭhat sa chu an en reng a, chutiang chuan an ti ve leh a, a tawpah chuan an nei ta mai che a ni. 

Ka thiamna chu fifth division-a khelhpui tham lek a ni a, ka thluak erawhin Bundesliga a cho zak thung. A tawpna chu second division-a inkhelh a ni. 

Football zuna uai ve mai ka ni a, mang neituah chuan min ngai suh u. 

Arsene Wenger chuan ball in pass kual reng a duh a, hla zawi awi tak ang mai a ni. Kei erawh chuan heavy metal ka ngaina thung.