Season tawpah Vettel a chhuak dawn

Formula 1 champion vawi li ni tawh Sebastian Vettel chuan tun season tawp rualin Ferrari a chhuahsan dawn, Italian team chuan an driver chhuah tur thu hi an 

puang chiang.

Ferrari team principal Mattia Binotto chuan, "Team leh Sebastian ten hun rei tak chhung contract kan buaipui a, a tawpa kan thutlukna chu contract neih lai hman zawh hnua inṭhen a ni. Kan pahnih tana a ṭha ber tur ngaihtuah hnua thil hi tih a ni," a ti.

German tlangval Vettel hian 2015 khan Ferrari team hi a zawm, a naupan lai aṭanga a mi ngaihsan Michael Schumacher hnung zuiin - car sen (red) khalh chunga F1 champion nih a tum.

Beiseina a sang a, mahse beisei ang erawh a ni lo. Red Bull car a khalh laia world champion vawi li ni thei hian car ṭha leh chak zawk a khalh hnuah pakhatna dinhmun a luah miah lo - Mercedes driver Lewis Hamilton a ngam lo.

Kum 32 mi Vettel hi hian Ferrari car khalh chhunzawm a la duh a, hmanni deuh khan season ṭan hmain contract pawh an ziak fel hman hial mai thei niin a sawi a, team lam pawhin chelh pawh an duh niin a lang.

Amaherawhchu, German driver hian beisei a phak lo a, rawlthar duhawm Charles Leclerc chunga mawhphurhna leh duhsakna dah san an duh avangin Vettel hi dinhmun leh sum ṭha tak tiam chunga inrempui an zuam lo niin a ngaih theih.

Vettel chuan, "Infiamna khawvela thil ṭha ber tur anga ngaihin thutlukna kan siam, tun ṭuma kan inrem theih loh chhanah hian pawisa a tel lo," a ti thung, a hma hun erawh a sawi chiang thei rih lo.

Sebastian Vettel a chhuah dawn takah chuan a hmun ruak luah tur zawn a ngai dawn a, thil awlsam a ni dawn lo. Khawthlang media-te chuan McLaren car khalh lai Carlos Sainz chu Ferrari zawm tur angin an sawi leh hman der tawh.

Spanish tlangval Sainz-a'n Ferrari a zawm a nih chuan a hmun ruakah Renault driver Daniel Ricciardo chu awm ve thung tura tarlan a ni bawk. Thu chiang la awm lo mah se a lan dan chuan anni pahnih hi Vettel vanga dinhmun sawn thei nia ngaih an ni.

Formula 1 season hi an la tlan ṭan thei lo a, world championship chu neih ngei an tum. Vettel tan Ferrari car khalh chunga a season hnuhnung ber a ni dawn a, a hun bul leh laihawl hmang ṭha tawk lo mah se a hmawr bawk ṭhat a tum ang.