MPL9 Final - A hun a thleng ta
Mizoram Premier League-ah champion thar an awm dawn a, zanina khelh tur Honda MPL9 final hi tualchhung football-ah chuan inkhel en châkawm bik a ni. FC Venghnuai leh Chawnpui FC ten an club chanchina a vawi khat nan MPL final an lut a, zanin dar 7:45 hian RG Stadium-ah nomawi an inchuh ang.
AIFF president Kalyan Chaubey chu khuallian a ni dawn a, MPL final hlutna a belhchhah dawn.
Tun ṭum hi AIFF President-in Mizoram a rawn tlawhna hmasa ber tur a ni a, rah ṭha pawh a thlen ngei a rinawm.
Honda MPL9 a hmawr bawkna tur a ni tawh dawn a, mimal lawmman zawng zawng pawh zaninah sem a ni ang. MPL-ah best player leh top scorer bakah best goalkeeper, best defender, best midfielder leh best forward-te thlan ṭhin a ni.
Rindika Vs Sanga
MPL ṭantirhah Venghnuai leh Chawnpui te hi champion rinkai an ni pha lo a, league round khelh zawhah pawh palina leh pathumna an ni chauh.
Team pahnih hian semifinal-ah an chunga awm Aizawl FC leh Chhinga Veng te an hneh thei a, coach pahnih Lalrindika Hmar leh Lalsangzuala Hmar ten fak an phu hle.
Tualchhung football-a coach thawkrim pahnih hian team ṭha tak an rem ve ve a, an khelh dan hmang erawh a danglam ve ve. Final hi coach pahnih inbeihna tur tiin a sawi theih.
Venghnuai tan captain Vanlalthanga a ṭangkai ṭhin a, chutihrualin team angin an khel tih erawh hai rual a ni lo. Striker langsar Lalrammuanpuia (Apuia) season chanve chhoa a inhliam tak avangin player naupang zawk Malsawmzuala Tlangte leh C. Ramnunpuia (Tea Chinzah) ten a hmunruak hi an luah khat ṭha hle.
Chawnpui lamin season liam ta top scorer MC Malsawmzuala an kawl a, Siaha tlangval hian goal riat khung tawhin top scorer a nih leh ngei a rinawm. MC-a thlawp tur hian veteran forward Samuel Laltlanthanga bakah Lalliansanga te an awm a, chutih rualin Laltlanzova (Zozoa) hi en bik tur zinga mi a ni ang. Zozoa hi Inter Village 2022-a Champhai Kanan champion puitu player pawimawh kha a ni.
Chawnpui coach Sanga chuan minute 90 chhunga chinfel a tum thu Vanglaini a hrilh a, hun pangngaiah goal a luh ngei a rinawm hle.
Chawnpui midfielder K. Vanlalhriatzuala a hmuhnawm ṭhin a, Venghnuai midfielder Thangzawmsanga a ṭangkai ṭhin. Final boruak la tem lo player an ṭhahnem a, hei hi final tihmuhnawmtu a ni thei bawk.
Mipui an tam dawn
Venghnuai leh Chawnpui ten Mizoram football-ah mellung thar phum an tum ve ve dawn a, khelmual chhung inbeihna ang thoin khelmual pawn inbeihna a lian dawn. Venghnuai hian kawr sen a han dawn a, Chawnpui hian kawr eng an ha ang.
RG Stadium hi Venghnuai tan chuan kea kalphak lek a ni a, MPL9 chhung zawnga ṭantu nei ṭha ber club hian final-ah pawh ṭhahnem zawk tura ngaih a ni. Chutihrualin Venghnuai ṭantute hian awmze neia auh an nei meuh ṭhin lo a, final-ah chuan an tamna hmang ṭangkai tur chuan fan-te kaihruaitu au hruaitu bakah khuang an mamawh ang.
Venghnuai lamin an hun a inher chhuak turah an ngai a, Chawnpui lam pawhin an hun thleng turah an ngai tho. Chawnpuiin hun ṭha bawhpelh an tum lo a, veng chhungah banner-te tarin ṭan la nasa hle. Ṭantu ngah lamah Venghnuai khum an tum a nih chuan si ruk laa an thawhchhuah a ṭul dawn a ni.
MPL9 Final - Thlirna Tawi
Zanin - December 6, Thawhlehni
6:30 PM Entertaiment
Chali, TBC-a & Jaui
7:30 PM Thusawi
7:45 PM Kick Off
Khuallian Kalyan Chaubey, AIFF President
Final
FC Venghnuai 7:45 PM Chawnpui FC
Semifinal-a khelh dan
FC Venghnuai
First leg: Joel B. Lalramchhana; C. Ngurnuntluanga (C. Ramnunpuia 19'), Lalnunsiama, Lalruatfela, C. Ramdinmawia, H. Lalrempuia; Lalruatfela (RF-a), Peter Lalrinhlua (Lalbiakzuala Chawngthu 65'), Thangzawmsanga (Eric Remruatpuia 65'); Vanlalthanga, Malsawmzuala Tlangte
Second leg: Joel B. Lalramchhana; Lalnunsiama, Lalruatfela, Lalruatfela (RF-a), C. Ramdinmawia, H. Lalrempuia; Malsawmzuala Tlangte, Lalbiakzuala Chawngthu, Thangzawmsanga; Vanlalthanga (Lalnunzira Hnamte 70'), Malsawmzela (C. Ramnunpuia 83').
Chawnpui FC
First leg: Moses Lalbiakngura (Lallawmzuala 46'); C. Lalhunruata, Lalrinchhana Tochhawng, Lalramdinsanga, K. Lalruatdika (Teka); Lallawmsanga (Lalbuatsaiha 88'), Malsawmdawngkima, K. Vanlalhriatzuala, Laltlanzova; Samuel Laltlanthanga (Lalliansanga 67'), MC Malsawmzuala (Vanlalhriattluanga 90')
Second leg: Lallawmzuala; C. Lalhunruata, Lalrinchhana Tochhawng, Lalramdinsanga, K. Lalruatdika (Teka); Lallawmsanga Chhakchhuak, Malsawmdawngkima, K. Vanlalhriatzuala, Laltlanzova; Samuel Laltlanthanga (Lalliansanga 72'), MC Malsawmzuala (John Lalhruaitluanga 90+2')
MPL Final atana ṭhutna leh lirthei dahna tur
1. FC Venghnuai tantute chu Helipad hnaih lam ṭhutna bucket seat-ah an ṭhu ang a, Chawnpui FC ṭantute chu R. Dengṭhuama Hall hnaih lam bucket seat-ah an ṭhu thung ang.
A ṭhutna lai takah neutral fans leh college zirlaite tan ṭhutna ruahman a ni.
2. Official Invitation Card neite official gallery lamah (dressing room hnaih lam) an ṭhu ang a, mipui nawlpui ṭhutna chu gallery thar (bucket seat) lamah a ni ang.
3. Lirthei keng tan R. Dengthuama Hall kawtah dah tur a ni a, players, club officials leh official invitation card nei tan Main Gate lamah a tlan luh theih ang a, a dang zawng chu stadium lamah tlan luh loh tur a ni ang.
Venghnuaiin player inhliam an nei
Final-ah hian inhliam vanga chhawr theih loh kan nei dawn. An hming erawh kan thup. Chawnpui hi team ṭha tak an ni a, coach ṭha tak hnuaiah an awm bawk a, final luh hi an phu ka ti. MPL ṭantirha semifinal lut tura rin loh ve ve kan nih ka ring a, hetiang dinhmun kan ding ta hi a tu ve ve pawh kan lawm viauin ka ring.
Pathian kaihhruaina vaka khel turin ka naute pawh ka ring tawk! Veng mipui an pawimawh dawn a, min tawiawm ṭhat pawh kan beisei. Kan veng mai ni lo, Mizoram hmun hrang hranga min ṭantu te min lo ṭawngṭaipui vek turin kan sawm che u. - Lalrindika Hmar, FC Venghnuai coach
Training hun pek danah Chawnpui an lawm lo
Tun ṭum MPL ka lawmna chu Chawnpui FC-ah hian Aizawl South Football Academy (ASFA) player 18 lai an awm a, match tinah player rukin bul a ṭan deuh ziah. Final-ah pawh kan academy player-te hmuh tur an awm leh ang.
Keimahah chuan pressure hi ka nei lo khawp mai a, MPL final hi vawi sarih ka luhna a ni tawh. Ka experience bikah chuan final-ah chuan khelmual chhunga lut tur player-te an pawimawh berin ka hria. Chutihrualin ṭha taka an khelh theih nan kan fuih erawh a ṭul dawn.
Extra time thlen kan duh lo a, minute 90 chhunga chinfel kan duh. Kan training hnuhnung ber (nimin tlai) erawh ka lungawi lo. Penalty zir kan duh a, set piece zir kan duh. Mahse kan zawhah FC Venghnuai an training dawn avangin kan training lai an thlir tawh a, kan zir a rem tawh lo. Theih chu ni se keini zingah training ila, kan khingpui turte tlaiah training mai se, a ṭhat ka ring.
Aizawl FC coach hlui Manuel Retamero pawh kha an khingpui tur an dawta an rawn training dawn chuan training kha a titawp mai ṭhin. Tun ṭuma kan chunga thil thleng hi thleng tawh lo se ka ti hle. - Lalsangzuala Hmar, Chawnpui FC coach
MPL coach zingah Venghnuai champion ringtu an tam zawk
Honda Mizoram Premier League Season 9 final tur chungchangah Vanglaini chuan MPL club paruk coach-te a kawm a, FC Venghnuai champion ring an tam zawk. Chutihrualin coach hrang hrang hian team pahnih an intluk tawk thu a sawi vek a, final hmuhnawm tak chhawp chhuah a ni dawn. - Standly Rozario, Aizawl FC
Dik taka sawi chuan Aizawl FC hi kan champion turah ka ngai a, player kim ṭhapa khel chunga kan chak ta lo kha mak ka ti a, pawi ka ti takzet bawk. Chutihrualin final khel turte hi team ṭha ve ve an ni. FC Venghnuai hian supporter ṭha tak an nei a, team boruak a ṭha hle. Coach Rindika hian hna ṭha tak a thawk a, a ṭul dan ang zelin match tinah formation a thlak. Final-ah pawh a hna ṭha tak hi chhunzawm leh a ngai ang.
Chawnpui coach Sanga pawhin hna a thawk ṭha. Semifinal an khelh theih nana Mizoram Police laka hun tawp dawna siphurh an sutte kha a hnathawh liau liauah ka ngai. Tlarhma lamah MC-a chu danglamna siamtu a ni a, goal venhim lamah Rinchhana a pawimawh. Team ṭha tak ve ve an ni a, Venghnuai 2-1 in an vanneih ka ring. - Anand Gurung, Chhinga Veng
Chawnpui FC hi an attack a na a, 4-3-3 an hmang turah ka ngai. Venghnuai lam hian 3-5-2 an hmang turah ka ngai thung. Team pahnihin training an nei ṭha ve ve a, inkhel a hmuhnawm ngawt ang. Chawnpui coach Sanga hian tawnhriat a nei ṭha zawk a, final-ah chuan hei hi danglamna a nei theiah ka ngai. Chawnpui 2-0 in an chak ka ring. - Lalbiaksanga Colney, Mizoram Police FC
Venghnuai hi set piece-ah an ṭha a, team combination pawh a ṭha a, team boruak pawh a ṭha hle. Chawnpui hi han fakna tur tehchiam ka hmu lo. Venghnuai 2-1 a an chak ka ring. - Lalremtluanga, Electric Veng FC
Venghnuai hi kan veng a ni a, coach Rindika bulah pawh, "Tun bak hi champion-na chance ṭha i nei lo," tiin ka hrilh a, ani pawhin a pawm hle. Venghnuai hi chu ka dah sang zawk a, a tir aṭanga tun thlengin team boruak a fuh chhoh hle.
Amaherawhchu lehlamah thlir chuan coach pahnih tawnhriat hi a inthlau deuh a, Chawnpui hi dah hniam a thiang chuang lo. Eng result pawh a thleng thei a, vawi khat chauh rin theih a nih si chuan Venghnuai 2-1 a an chak ka ring. - K. Malsawmkima, Chanmari FC
Final-a inkhel turte hi mimala ṭha lua awm si loin team angin an ṭha dun khawp mai. Venghnuai hi team ṭha tak an ni a, chutihrualin Chawnpui hi an vanneih ka ring mah mah. MPL-a ka rawn let leh khan uluk takin Chawnpui leh Chhinga Veng inkhel kha ka en a, Sanga naute inkhel kha pui ka ti lutuk. A hnu zelah pawh Chawnpui kha an khel ṭha zel a, chuvangin 2-1 a an chak ka ring. - Victor Lalbiakmawia, FC Bethlehem
Rin thiam a har, ka ti. Chawnpui hian player tawnhriat ṭha ann nei. Tlarhmaah MC-a a awm a, Zozoa a hlauhawm reng bawk. Kil tinah innghahna an nei zel a, tlarhnungah Rinchhana a lo awm bawk a, team ang chuan chuan ka dah sang zawk. Mahse, Venghnuai hi an fighting spirit a ṭha a, VL Thanga-ah a innghat kan ti ṭhin mah ila Thanga tel loin pawh an khel ṭha zek.
Team pahnih hi an intluk tawk em avangin hun pangngaiah 1-1 in an inhnehtawk ka ring a, FC Venghnuai 5-4 a an vanneih ka ring.
