Ronaldo leh Portugal inlan hun

Cristiano Ronaldo hoin Portugal chuan zanin dar 12:30 hian Switzerland an hmachhawn dawn. Portuguese team hi South Korea laka tlawm hlim an ni, tun ṭumah chuan chak loh a thiang dawn lo - chak lo chu tlak nghal a nih dawn avangin tihsual theih a remchang dawn lo.

Korea laka an chak loh avangin Portugal team an ṭha tawk lo nia rinhlehna a sang, mahse group match hnuhnung ber an khelh hma khan an tling chiang tawh, coach Fernando Santos-a'n player ṭha paruk ngawt siksawi chungin Asian team a hmachhawn tih hriat a ngai.

Portugal kan sawi chuan, captain Ronaldo chungchang sawi a ngai. Real Madrid forward hlui hian tun World Cup bikah goal khat chauh a la khung, chu pawh penalty aṭangin a ni, kum 38 mi a nih tawh avangin a vanglai ang kha a ni tawh lo.

Ronaldo chungchangah Portuguese chanchinbu A Bola chuan mipui ngaihdan an la, ngaihdan an lak aṭanga a lan dan chuan 70% zetin Ronaldo chu bul ṭan lo turin an duh, mahse thutlukna siam tur chu coach Santos a ni.

Rafael Leao, Joao Felix, Guedes, Andre Silva leh Goncalo Ramos te nei mah se, tlarhma lama a changtupa chu Ronaldo a la ni reng a, ani a tel hian team an ṭha zawk em tih erawh ngaihdan a inang lo thei viau ang.

Chiang taka sawi ngam erawh Ronaldo hian Swiss team a hmachhawn ang, goal a khung a nih pawhin mak ti suh - ani hi chu inkhel boruak sang leh pawimawh laia che fuh leh tlat ṭhin kha a ni.

Switzerland hian Arsenal midfield khaidingtu Granit Xhaka an nei, ani bakah hian ball thiam Xherdan Shaqiri an nei bawk. Swiss team hi an huaisen a, Euro 2020 aṭanga France pet chhuak theitu kha an nih avangin an chhe lo.

World Cup khel tura an kalkawngah pawh Swiss team hian Italy an nek chhuak thei, mimala langsar tak sawi tur nei tam lo mah se an thawhhona ṭha chu an innghahna a ni leh dawn - Serbia team hneh hlim hian inrintawkna sang tak nen Portugal an hmachhawn thei dawn a ni.

FIFA World Cup 2022
Last 16
December 3, Inrinni
Netherlands 3 - 1 USA
NED: Memphis Depay 10'; Daley Blind 45+1'; Denzel Dumfries 81'
USA: Haji Wright 76'
Argentina 2 - 1 Australia
ARG: Lionel Messi 35'; Julian Alvarez 57'
AUS: Enzo Fernandez 77' (OG)

December 4, Pathianni
France 3 - 1 Poland
FRA: Olivier Giroud 44'; Kylian Mbappe 74', 90+1'
POL: Robert Lewandowski 90+9' (P)
England 3 - 0 Senegal
ENG: Jordan Henderson 38', Harry Kane 45+3'; Bukayo Saka 57'
Nizan Inkhel - Result kan hre hman lo
Japan 08:30 PM Croatia
Brazil 12:30 AM South Korea

December 6, Thawhlehni
Morocco 08:30 PM Spain
Portugal 12:30 AM Switzerland

Quarterfinal
December 9, Zirtawpni
JPN/CRO 8:30 PM BRA/KOR
Netherlands 12:30 AM Argentina

December 10, Inrinni
MOR/ESP 8:30 PM POR/SWI
England 12:30 AM France