France tan Giroud leh Mbappe an vul

Olivier Giroud-a'n France tana goal khung hnem ber record a siam zanah France chu Poland lakah 3-1 in hnehna an chanpui, forward ṭha bik Kylian Mbappe-a'n goal hnih hmangin World Cup chu a tlangnelna hmun a ni tih a lan tir bawk.

Pathianni zan Al Thumama Stadium-a World Cup last 16 inkhelah France tan Giroud chuan goal hmahruai a khung, Les Bleus tana goal khung hnem lamah Thierry Henry nen record inṭawm an neih (51 goals) chu a kal san a, amah chauhin a chung berah a awm ta.

World Cup champion lai France hian December 10, Inrinni zanlaiah England an hmachhawn leh dawn, Three Lions hian last 16 inkhel dangah Senegal chu 3-0 in an lo hneh ve thung, quarterfinal inkhel a hmuhnawm dawn.

France an chungnung
Didier Deschamps-a'n hliam vangin a player neih ṭhat zawng zawng a hruai thei lo tih kan hria, hun tepter tawh taka Karim Benzema a inhliam phei kha chuan a aiawhtu tur a ko tawh lo, ka neihsa hi ka ring tawk, a ti hmiah mai a nih kha.

Poland lakah France hian inkhel an thunun, goal erawh an khung thei lo. Polish team chu goal khung teuh hmasa zawk an ni hial, hnai zetah Piotr Zielinski-a shot chu Hugo Lloris zawnah a kal hlauh, a sir hretah pet ni se dan hman loh tura hnai leh kawh a ni.

Robert Lewandowski pawhin box pawn hla deuh tak aṭangin remchang a insiam chawp thei, hlauhawm takin pet mah se goal ban hrulah a kal, goal zawn ni se captain Lloris tana hna tautak a tling ngei ang.

Chawlhlawk hma deuhin Giroud a inlar, a ni hian Mbappe ball pek fing tak chu tawih zetin a khung, keeper khel ṭha thei em em mai Wojciech Szczesny tan pawh dan ngaihna a awm lo, 1-0 in chawlhlawk an hmang.

Second half-ah Mbappe-a'n a tlan chakna hmangin Poland tlarhnung a tibuai fo a, a hmawr a bawk dan erawh box chhunga a huaisen vang a ni. Paris Saint Germain forward hian chiai leh tim eih nei loin a pet lut chiang hle.

Giroud leh Mbappe
Premier League-ah season 10 chhung hun a hmang a, Arsenal leh Chelsea tana a khelh hnuah AC Milan a pan a nih kha, mi tam tak chuan Giroud tan football zinkawng a tawp dawn tawh niah an ngai, mahse a lo la ni ngawt lo.

Kum 36 mi Giroud hian season hmasa khan Milan tan goal 14 a khung a, kum 11 hnua a vawi khat nan Serie A champion a nih pui. France tan pawh koh loh zingah tel zauh zauh hman mah se Benzema inhliam zarah Giroud rinrawl a ni a, Arsenal leh Chelsea striker hi hun pawimawh a rintlak hle.

Giroud hian France tan match 117 a khel tling ta a, a sulhnu hi sawi nep theih a ni lo - goal khung tam ber a nih bakah World Cup nomawi a chawipui tawh, a vawi hnih nana champion leh thei dinhmunah an ding mek.

Record a siam avangin Giroud hming a ri ring, khelmual chhunga hlauhawm ber erawh Mbappe a ni. Mbappe hian an ram tan match 63 a khelh aṭangin goal 33 a khung der tawh, kum 23 mi chauh a la ni tih hria ila.

A tlan chak em em a, a che rangin a huaisen bawk. Mual sir aṭangin ball hlauhawm a siam chhuak ṭhin a, remchang a hmuh zeuh chuan goal khung turin a inpeih reng bawk - ram tan match hnuhnung 14 aṭanga goal 16 khung thei a nihna hian a pawimawhna a hrilhfiah ang.

Fakna thu a chhuak
France coach Deschamps chuan, "Olivier hi kan tana mi pawimawh bik a ni reng. Kum li liam ta khan Russia ramah World Cup kan khel, goal a khung miah lo. Striker berin goal a khung lo khan sawi a hlawh a ni mai thei, kan inkhel lai entu tan erawh a ṭangkaina a nep lo.

"Sawiselna leh diriamna a tawk fo a, mahse dawhthei takin a ngawi mai ṭhin. Miten an sawiselna hi a rilru tih paukhauh nan a hmang zawk a, inelna sanga hetiang zat goal khung thei hi chu a nep lo hle, amah leh a khelhpui ten fak an phu," a ti.

Deschamps hian Poland lakah khan a tir lamah duhthusamin an khel ṭha tawk lo tih a pawm a, second half an khelh danah erawh a lungawi thung. England nen semifinal luh an inchuh dawn a ni a, inkhel a hmuhnawm ngei ngei ang.

Mbappe chungchang sawi zuiin Deschamps chuanm "Hun rei lote chhung inkhel a ti danglam vek thei. Tun ṭumah khan France-in Kylian Mabppe a mamawh a, kan mamawh chhanna chu min rawn pe ngei a ni," tiin a sawi.

Poland coach Czeslaw Michniewicz pawhin Mbappe chu dan ngaihna awm lo niah a ngai, "Tumah in a dan theih dan tur an hre lo ang," tiin coach dangte pawhin an chelh theih bik loh tur thu a sawi hial a, chak phu zawk an chak tih a pawm bawk.