Lewandowski match hnuhnung ber?

"Poland tana ka match hnuhnung ber a ni," tiin la sawi chiah lo mah se, striker ropui Robert Lewandowski tana hun hnuhnung lam chu a ni tawh a, inelna lian World Cup a thlen leh meuh chuan kum 38 a tling hnai dawn, a khelh a rinawm tawh lo zawk.

Barcelona striker Lewan-dowski hian France lakah penalty a khung a, mahse a tlai tawh bakah goal thum an chhuah hnu a nih avangin an ram chhanhim nan a tawk zo lo. Saudi Arabia lakah goal a nei bawk, a duhthusam zinga pakhat World Cup-a goal khung chu a ti hlawhtling ta tho.

Lewy chuan, "Taksa lam chauh ngaihtuah chuan ka huphurh hran lo, mahse khelmual pawn lamah thil hrang hrang a thleng thei. World Cup khelh leh hunah nuamti leh hlim takin football ka la khel thei reng a ngem tih pawh sawi theih a ni lo.

"Kan thil tum hmasa chu World Cup khelh a ni a, chumi hnuah group stage paltlang, a pahnihin kan ti hlawhtling. Sang tak thlen zel duh mah ila kan tawn chinah kan lawm," tiin a sawi.

Poland hian kum 1986 hnua a vawi khat nan World Cup last 16 an lut leh a ni a, an hma a ding France hi champion lai an nih bakah, squad chhah ṭha tak an nih avangin an tan paltlang a harsa.