Spain hmaah Morocco
Europe khawmualpuia ram hriat hlawh, a bik takin football vanga hmingthang chu Spain an ni. An ram ṭhenawm hnai taka awm, 14.3km leka mi Morocco nen zanin dar 8:30 hian World Cup last 16 an khel dawn.
Ram pahnih hi an inhnaih viau, hun rei lote chhunga inkal pawh thei an ni. Mahse, Spain awmna hi Europe a nih laiin, Morocco erawh North Africa khawmualpuia awm a ni thung, ram pahnih hian ze hran an ni - zaninah erawh duh thunum a ni dawn, chak zawk nih an tum ve ve ang.
La Roja hi Group E aṭanga tlang an ni, an match hmasa berah khel turu viau mah se Germany nen an inhnehtawk bakah Japan an ngam lo, sawisel bo khawpa ṭha an ni bik lo, pahnihna ni chungin last 16 a lut.
Croatia leh Belgium an awm avangin Morocco kha rinkai an ni lo, mahse group match vawi khat ṭheuh an khelh chhuah meuh chuan African ram hi a chung berah an awm, coach ṭha Luis Enrique naute tan zuam sual theih tur an ni.
Spain hian Costa Rica lakah kawng tinrenga chungnung chungin point thum an hmu a nih kha, a hnu lam match hnihah erawh siamṭhat ngai lai an nei nual, a bik takin tlarhma an bil chhunzawm daih kha a mak angreng hle.
Zirtawpnia training an neihnaah Dani Olmo, David Raya leh Cesar Azpilicueta te an tel lo, defender Azpilicueta hi Japan nen an inkhelh ṭuma hliam kha a ni a, zaninah bul a ṭan lo a nih pawhin a mak lo ang.
Nico Williams leh Alejandro Balde te an dam a, match hnuhnunga hahchawlhtir Ferran Torres leh Jordi Alba te erawh a bul aṭangin an inlan tawh ang- a tawi zawnga sawi dawn chuan - an ṭhat dan berin an khelh theih a rinawm.
Japan-in goal hnih an khung theih avangin La Roja tlarhnungin inenfiahna tur an nei tih a chiang. Morocco hian Chelsea forward Hakimi Ziyech an nei, ani ke aṭang hian ball hlauhawm a chhuah fo tih an hre ngei ang a, ven dan tur pawh an ngaihtuah a ngai dawn.
Ziyech bakah hian Paris Saint Germain wingback Achraf Hakimi an nei, ani hi goal venhim bakah a nawr lam kawnga mi pawimawh a ni a, anni pahnih chauh pawh hi ngaihven tham an ni ve bawk - mual sir lam chu Morocco hlauhawmna a ni leh ang.
Spain squad thlir chuan, mimala sawi fal tur awm bik lo khawpin an intluk tlang viau. Midfield-ah Pedri leh Gavi te an rintlak a, tawnhriat nei ṭha Sergio Busquets an neih bawk avangin inkhel chu an thunun leh ngei ang tiin a sawi ngam.
Tlarhnung hi fiahin an awm dawn. Manchester City defender Aymeric Laporte-a theihna hi chu rinhleh tur a awm lo. Mahse, a bula ding Rodri hi midfielder a ni, defender pangngai ni lo tlarhnung laia dintir hi a fuh chiah em tih kan hmu dawn.
Enrique-a'n Sergio Ramos a ko lo ngam a, a thutlukna hi a huaisen thlak viau. Real Madrid captain hlui tel lo hian ṭha tak chuan an khel thei ngei mai, boruak sangah eng ang tak nge an nih chu kan hre dawn - inkhel hmuhnawm a beisei ngam.