Senegal hnehtu England an nghet

England chuan World Cup champion thei zinga mi an nihna an lantir leh ta. Three Lions hian Pathianni zan last 16 inkhelah Senegal chu 3-0 in an hneh a, harsatna lian tham tawk loin Qatar World Cup quarterfinal an lut.

Gareth Southgate-a naute hian semifinal lut tur chuan France an hneh a ngai dawn, champion lai Les Bleus hian inkhel dangah Poland chu 3-1 in an hneh ve thung, ram ropui pahnih inkhel hi a hmuhnawm dawn.

Goal thum
Al Bayt Stadium-a inkhelah Senegal tana Boulaye Dia pet chu keeper Jordan Pickford-a'n ṭha zetin a dansak a, a hnu lamah erawh African champion hi an hlauhawm zui tam lo - England goal khung tur ven chu an hnapui ber a ni.

Jude Bellingham chu England inkhel khaikhawmtu pawimawh a ni. Borussia Dortmund midfielder hi kum 19 mi chauh la ni mah se a puitling tawh, mual sir aṭangin Jordan Henderson khung tur a siamsak.

An goal hnihnaah pawh Bellingham a pawimawh, a ball pek dawngtu Phil Foden chuan Harry Kane tan a siamsak - England captain hian tun World Cup a goal hmasa ber tur a hlap lut, keeper Edouard Mendy tan man theih a ni lo.

Southgate-a'n match hnuhnung bera che ṭha tak Foden a ring chhunzawm a, a ti sual lo chiang hle. Manchester City forward hian Kane khung tur bakah Bukayo Saka tan a siamsak bawk, Arsenal forward tan Foden siamsak khung turin hna a awlsam tawh.

England an ṭha
Harry Kane thlawptu tur hi tu ber nge ni ang tih chu England buaina a ni. Three Lions captain hian goal a khung hma pawhin a nawr kawngah a ṭangkai thei hle a, boruak a san zawh pauh leh a pawimawhna a lang zel ang.

Marcus Rashford khel ṭha viau mah se Senegal lakah chuan a tira rin hlawh zawk Saka kan hmu leh a, thutlukna a siam sual lo. Raheem Sterling chawlh tir ngam tur khawpin Foden kha a thiam, striker Kane tan hna an thawk ṭha hle bawk.

Henderson leh Declan Rice te hmaaah Bellingham kha a duhtawkin a che thei, tharum a ngahin ball a thiam tel bawk a, ball pass a la thiam tel leh zel avangin English player dangte aiin a danglam - kum 19 mi chauh a la ni leh nghal.

Southgate-a naute hian match li aṭangin goal 12 an khung der tawh. World Cup hmasa khan semifinal lutin goal 12 an khung a, football inelna liana goal an khung hnem ber ṭum an tawng, kuminah an record hmasa hi an nihrual der tawh.

Tlarhnung lam
Harry Maguire leh John Stones te hi Manchester United leh Manchester City tana rinrawl an nih rih lo. Mahse, ram tan chuan player dang daih an ni. Southgate-a'n team a dinah hmun pawimawh tak an chang a, an chang chhunzawm ang.

England hian an match hmasa berah Iran 6-2 in an sawp, an hnuah match thum khel leh tawhin goal an chhuah lo vek - Iran laka an goal chhuah pakhat hi penalty aṭangin a ni, a awmzia chu English defender-te an khel ṭha hle.

Kyle Walker leh Luke Shaw ten hna an la tlin rih viau, an thachhang dawl turin Kieran Trippier leh Trent Alexander-Arnold te an la awm bawk, squad a chhah ṭha viau, hei erawh hriat tel a ngai - khawvel striker ṭha leh hlauhawm tak tia sawi tur an la hmachhawn rih lo.

France lakah chuan England tlarhnungte hian hna an ngah tawh dawn, kum 1966 hnua champion leh turin an ṭha tawk reng em tih fiah a ni dawn. France an hneh thei a nih ngat chuan huphurh tur dang an awm tawh bik lo ang.

Hnehna hmanga chhan let
England midfielder Declan Rice chuan, tournament ṭan hma khan mi tam takin an ram chu ṭha taka khel turin an ring zo lo tih a sawi a, heng rinhlehna mit nena thlirtute hi thil tih hmangin an chhang let zel tih a sawi chhuak.

Rice chuan, "Kan khelh dan aṭanga teh chuan, kan phu ang tawk fakna kan dawng lo niin ka hria. Netherlands leh Argentina te inkhel en ila, ṭha taka khel chungin hnehna an chang tih chu kan hria, khawvelin hahipin a fak pawh hi a mak lo.

"Keini pawhin anni ang tho hian kan khel chhuak ve niin ka hria. Tun hnai kan inkhel hi an thlir a nih chuan, ram dang pawh hian min hmachhawn huphurh vein ka ring," tiin a sawi a, a ṭhiante chu sang tlak thlen pui theih tur an nih thu a sawi bawk.

A zawnin match thum chhung goal an chhuah lo a, kum 1982 hnuah World Cup match bika goal an chhuah leh rei ber ṭum a ni hial. Rice hian France nena an inkhelh tur chu thil thleng zen zen ni lo, mipui hmuh châk a nih thu a sawi bawk a ni.

Hma lam thlirtu Southgate
England manager Gareth Southgate chuan Senegal laka a naute khelh dan chu lawmawm a tih thu a sawi a, an tan fiahna tak erawh France nen quarterfinal an khelh hunah a nih tur thu a sawi tel bawk.

Southgate chuan, "Ka naute hian tun hnaiah nasa takin hma an sawn. Tournmanet lian champion hi vawi leh khata lo thleng thut thei a ni lo, tun dinhmun chauh thleng tur pawh hian rei tak chhung kan bei.

"Goal thum kan khung a, kan lamah goal a lut lo. Hetiang inkhel result hi chu hriat a nuam ṭhin, tunah hian dinhmun ṭha takah kan ding ve ta niah ka ngai," tiin a naute khelh danah a lungawi rih hle.

Three Lions hian World Cup 2018-ah semifinal an thleng a, Euro 2020-ah final an lut bawk, kuminah last 16 an paltlang leh ta chiah bawk. A ṭum khat nan a zawnin major tournament knockout stage-ah hnehna an chang.

ṬSouthgate chuan, "France aia fiahna lian hi kan tan chuan a awm thei tawh lo ang. World champion ni lai an ni a, player ṭha rual awmkhawm an ni bawk, kan tan chuan chona lian leh harsa tak a ni dawn," tiin a sawi.