Zaninah MPL9 mimal lawmman dawng tur a hriat dawn

Mizoram Football Association chuan Honda Mizoram Premier League Season 9-a mimal lawmman dawng thei tur list phochhuah a ni tawh a, position tinah player pali zel an awm. Zanin hian position hrang hranga mimal lawmman bakah hian best player leh top scorer-te thlan an ni bawk.

Best player hi champion team aṭanga thlan a ni tlangpui a, player 16 thlan chhuah zingah finalist FC Venghnuai leh Chawnpui FC te player thawh belhkhawm chu player panga chauh a ni.

FC Venghnuai aṭanga thlanchhuahte chu keeper Joel B Lalramchhana leh defender Lalruatfela te an ni a, Chawnpui lamah defender Lalrinchhana Tochhawng, midfielder K. Vanlalhriatzuala leh forward MC Malsawmzuala te an awm.

Player panga hming thlirin best player tur hriatthiam har ber ṭum a ni thei ang. Season pum thlir tur a nih chuan Venghnuai keeper Ramchhana aiin Chhinga Veng keeper RS Lallawmzuala leh Mizoram Police keeper F. Lalmuanawma te buk a la rit zawk. Best defender turah pawh FC Venghnuai defender Lalruatfela ai chuan Aizawl FC captain Lalchhawnkima buk a rit a, hei hian chiang taka lantir chu Venghnuai hi team angin an ṭha rual tih a ni.

Chawnpui erawh mimal chawimawina dawng turin an beiseiawm viau thung. Captain Lalrinchhana Tochhawng hi best defender dawng tura beseisawm a ni thei a, Chhawnkima nen an inbuk tawk viau ang.

Best midfielder nominee-ah table-a sang palia awm pha lo player pahnih ngawt an lang a, hemi a nih avang hian season tluana khel ṭha Chawnpui FC midfielder K. Vanlalhriatzuala buk a rit viau bawk.

Best forward-ah Chawnpui FC-in top scorer ni ngei tura ngaih MC Malsawmzuala an kawl a, Siaha tlangval dinhmun a ṭha. Chutihrualin Police striker Malsawmfela chu elpui tham a ni thung ang.