Kolkata khawpuiah Bagan an lian zawk

India rama club inhal bera chhal chu East Bengal leh Mohun Bagan an ni - Nimin tlai khan club pahnih hi tun season I League-ah a vawi khat nan an intawng a, hnehna changtu chu Mohun Bagan an ni. Sanjoy Sen-a naute hi 1-0 in an chak.

Salt Lake Stadium-a mipui 64,630 pungkhawm hmaah season hmasa I League champion Aizawl FC player hlui pali an inlar a, a langsar ber erawh goal khungtu Eze Kingsley a ni.

Inrinni zan I League inkhelah Shillong Lajong chuan an mikhual Churchill Brothers 2-0 in an hneh bawk a, Redeem Tlang leh Samuel Kynshi ten goal khat ve ve khungin Redeem-a goal khung hi captain Samuel Lalmuanpuia siamsak a ni - F. Lalrohlua chu hun tawp dawnah tlan luhtir a ni bawk.

The Wall

Aizawl FC tana a khelh laiin tlarhnungah Eze Kingsley chu ban rinawm a ni ṭhin a, a hming lemah 'The Wall' tih a ni. Nigerian defender hian Pathiannia derby boruak sangah pawh club liante chil ti puttu a nih chhan a pholang a, EB tlarhma lama Willis Plaza leh Charles D Suoza te dah niltu a ni.

Hei mai hi a ni lo, kum 26 mi defender hian minute 39-naah he inkhela goal awmchhun a khung - Sony Norde corner chu Kingsley hian a tauh lut a, EB lamin a sutna tur an neih tawh loh avangin Bagan an chak.

Mohun Bagan tan minute 90 chhung khel Ricky Lallawmawma sawi hmaih theih a ni lo a, Durtlang tlangval hian tlarhnung lamah a khel ṭha hle.

Khalid-a magic?

East Bengal-in I League nomawi chawi an duh miau avangin season hmasaa rin loh taka Aizawl FC champion puitu coach Khalid Jamil an lalut a, Mumbai lam chhuak boss hian an beisei ang erawhin bul a ṭanpui lo hle - an match hmasa berah champion lai AFC chu 2-2 in an inhnehtawkpui a, Kolkata Derby-ah an tlawm leh ta bawk.

Khalid-a'n Mizo club aṭanga a chhawm zingah Mahmoud Al Amna, Brandon VL Remdika leh R. Laldanmawia te inkhel bul a ṭantir a, starting XI-ah U22 player an awm ngei a ngaih avanga bul a ṭantir Mehtab Singh chu minute 29-naah la chhuakin Lalramchullova a luhtir bawk. Mahse, AFC-a a hlawhtlinpui player-te pawhin Khalid-a 'magic' an kai tho thei lo. Danmawia'n mawi zeta shot a neih chu Bagan keeper Shilton Paul fakna a ni a, Sialhawk Express tia hriat lar forward hian hun tawp dawnah 'bin' luh tumin invawrh mah se goal zawnah a kal lo bawk.

East Bengal tan Willis Plaza-a'n minute 73-naa a chance neih a khung lo chu a ui vawng vawng ang a, tih tluk a nih avanga penalty a hlawh zui lo khan sawi zui a hlawh viau bawk ang.