Premier League a hmuhnawm

Inrinni zan Premier League inkhelah Everton-in coach thar Sam Allardyce hnuaiah hnehna an chang a, Liverpool-in Brighton & Hove Albion 5-1 in an sawp a, Watford-in Tottenham Hotspur an chelh a, Chelsea tan Eden Hazard a vul bawk.

Big Sam hnuaiah Everton-in Gylfi Sigurdsson leh Dominic Calvert-Lewin te goal hmangin Huddersfield Town 2-0 in an hneh a, Toffees hi match zawna an chak avangin 10-naah awm derin Allardyce chuan hma an sawn zel a beisei thu a sawi nghal bawk.

Liverpool tan Philippe Coutinho a langsar a, kai thar Brighton tan dan rual an ni lo. Roberto Firmino-a'n goal hnih a khung bakah Emre Can leh Coutinho ten goal khat ve ve khungin Brighton defender Lewis Dunk chuan an lamah a ti goal bawk.

Watford-in Spurs harsatna siamin Christian Kabasele hmangin an mualah an khung hmasa a, first half-ah vek Son Heung-min hmangin sut mah se minute 52-naah Spurs defender Davinson Sanchez chu hnawhchhuah a ni a. Player 10-a khel chungin Mauricio Pochettino hoten point thum an hlawh chhuak thei lo.

Newcastle-in Stamford Bridge-ah Dwight Gayle hmangin minute 12 lekah hma an hruai a, Chelsea chhaih kawltu chauh a ni. Eden Hazard-a'n Newcastle tlarhnung tan vawi tam buaina a siam a, Belgian forward hian goal hnih khungin Alvaro Morata-a'n goal khat dang a khung bawk.