Group of Death tiha chhal theih tur a awm lo
2018 FIFA World Cup draw chu Zirtawpni zan khan State Kremlin Palace, Moscow-ah neih a ni a, group harsa bik 'Group of Death' tiha chhal tur an awm lo niin a lang. Football inelna ngaihhlut ber hi nakkum June 14 - July 15, 2018 hian Russia-ah khelh a ni ang.
Champion lai Germany chu group F-ah Sweden, Mexico leh South Korea te nen an awm ho a, Die Mannschaft tan hna harsa tur awmin lang lo mah se pahnihna inchuhna erawh a nun ṭhat beisei a ni. Europe-a ram langsar zingah Portugal leh Spain te chu group B-ah an awm kawp a, group G-ah England leh Belgium te an awm dun bawk a, team dang an nem thung avangin knockout stage an thlen loh chuan upset tih theih tur a ni.
Lionel Messi telna Argentina chu group D-ah inkhelh thiam ram Croatia nen dah kawp an ni a, Africa ram aṭanga ṭha ṭhin Nigeria leh tun hnaia beiseia aia che ṭha Iceland an tel bawk avangin he group hi a ngaihnawm viau thei ang.
Opening match hi inelna thlengtu Russia leh Saudia Arabia ten June 14, zan dar 8:30-ah an khel ang. Inkhelh hun hi India ram aṭanga thlirtu tan chuan duhthusam a tih theih a, inkhelh hun hnuhnung ber hi 11:30-ah khelh a ni ang a, tlai dar 5:30 leh zan dar 8:30-a inkhel a awm bawk dawn a ni.
Group inṬhenhran dan
Group A: Russia, Saudi Arabia, Egypt, Uruguay
Group B: Portugal, Spain, Morocco, Iran
Group C: France, Australia, Peru, Denmark
Group D: Argentina, Iceland, Croatia, Nigeria
Group E: Brazil, Switzerland, Costa Rica, Serbia
Group F: Germany, Sweden, Mexico, South Korea
Group G: Belgium, Panama, Tunisia, England
Group H: Poland, Senegal, Colombia, Japan