First Div-ah Zo United an champion
Aizawl DFA hnuaia First Division inelnaah Zo United-in champion turin Aizawl FC Academy 3-1 in an hneh. Zirtawp zan Lammual inkhelah hian Zo United tan F. Lalnuntluanga'n goal hnih a khung a, C. Lalmalsawma goal khat khung ve bawkin AFC Academy tana H. Lalnunzira goal khungin result a tidanglam pha lo.
Zo United coach pahnih H. Lalremruata leh F. Lalrozara ten an thawhrim rah an seng a, final-ah league round-a pakhatna AFC Academy an hneh. Zo United player-te hi rawlthar rual an ni a, an player tam zawk hi MPL Under 18-a Chhinga Veng champion puitute kha an ni.
MPL Under 18 best player C. Beithatlo chuan first division-ah hian best midfielder chawimawina a dawng a, final-a goal hnih khungtu F. Lalnuntluanga chuan goal sarih khungin top scorer a ni a. Ngopa rawlthar Tluangtea hian MPL U18-ah goal riat khungin top scorer a ni a, best forward-ah thlan a ni bawk.
Darzo tlangval Rozara chuan, "Kan player-te an naupan avangin training kan ṭan hma a, August 1-ah training kan ṭan tawh. Kan player-ten inzirna tur an ngah a, training an chhawr ṭangkai a, kan thawhrim rah leh theihtawp kan chhuah zara nomawi kan chawi thei hi kan ngai hlu em em a ni," tiin Vanglaini a hrilh.
MPL5-ah Zo United hi Mizoram football league sang ber aṭangin an relegate a, first division-a an champion leh takah chuan MPL7 Qualifier an hmachhawn thei ang. Aizawl FC Academy erawh an senior team MPL-a an awm tawh avangin qualifier an khel ve thei lo a, pathumna Chawnpui FC chuan MPL criteria an tlin chuan qualifier an khel ve bawk dawn a ni.
Final Result
Aizawl FC Academy 1 - 3 Zo United FC
AFC : H.Lalnunzira 79'
ZUFC : F. Lalnuntluanga 27', 90'; C. Lalmalsawma 67'
Lawmman
Fair Play Team FC Venghnuai - Rs 10,000
Top Scorer F. Lalnuntluanga (7 Goals), Zo United FC
Best Forward JH Lianzuala, FC Venghnuai
Best Midfielder C. Beithatlo, Zo United FC
Best Defender Lalchungnunga, Aizawl FC Academy
Best Goal Keeper Lalrinnunga Hnamte, SL Sailo EFC
# Mimal Lawmman hian Rs 2,000, trophy leh certificate a keng tel.
ADFA I Div League Position
# Team Lawmman
1 Zo United FC Rs 1,00,000
2 Aizawl FC Academy Rs 50,000
3 Chawnpui FC Rs 40,000
4 SL Sailo EFC Rs 30,000
5 FC Venghnuai Rs 25,000
6 Chaltlang FC Rs 20,000
7 Ramhlun FC Rs 15,000
8 Venghlui FC Rs 10,000