NorthEast United an chak ve ta

NorthEast United-in an match hmasa pahniha hnehna an chan zawh loh hnuah chak hmel an hmu ve ta a, an mikhualna ramah Delhi Dynamos chu 2-0 in an hneh. Delhi tan an match hmasa pahnihah Lalhmangaihsanga Ralte inlan mah se North Mualcheng tlangval hian Highlanders lakah erawh a hmel a lan lo a, Highlanders lamah captain Robert Lalthlamuana hmel hmuh tur a awm lo bawk.

Delhi khawpuia inkhelah Guwahati club hian minute 17-na leka Marcinho goal khung hmangin hma an hruai a, minute 22-naah Danilo Lopes chuan goal dangin a chhunzawm ve bawk. Delhi coach Miguel Portugal chuan goal khung beiseiin inkhel bul a ṭantir loh Lallianzuala Chhangte chu second half-ah tlan luhtir mah se Lunglei rawlthar hian goal a keng tel lo a, Emerging Player of the Match-ah erawh thlan a ni tho.

NorthEast United tan match hmasa pahniha inkhel bul a ṭan hnuah Lalrindika Ralte chu minute 74-naa Marcinho thlak tura tlan luhtir a ni a, Lalrempuia Fanai chuan bench lamah hun a hmang tluan thung.

Zirtawpni tlai inkhelah Jamshedpur FC leh ATK chu goal khung loin an inhnehtawk bawk a, JFC tan Jerry Mawihmingthanga'n hmun pawimawh chan chhunzawm zelin inkhel bul ṭan tir a ni–match thum an khelh tawhah inkhel bul a la ṭan vek a, Chanmari rawlthar hi Emerging Player of the Match-ah thlan a ni bawk.

Mimal Lawmman
Jamshedpur FC 0–0 ATK
Swift moment of the match Subrata Paul, Jamshedpur FC
Winning pass of the match Prabir Das, ATK
Fittest player Prabir Das, ATK
Emerging player Jerry Mawhmingthanga, Jamshedpur FC
Hero of the match Memo, Jamshedpur FC
NorthEast United FC 2–0 Delhi Dynamos
Swift Moment of the Match Marcinho, NorthEast United FC
DHL Winning Pass of the Match Halicharan Narzary, NorthEast United FC
Amul Fittest Player Danilo Lopes, NorthEast United FC
Emerging Player Lallianzuala Chhangte,Delhi Dynamos
Hero of the Match Halicharan Narzary, NorthEast United FC