Barca point hloh zanah Real chak zo bik lo

Spanish La Liga-ah Real Madrid-in an elpui Barcelona hnaih sawt theihna hun remchang nei mah se an chhawr lo; Inrinni zan khan Barcelona chuan an mikhual Celta Vigo chu 2-2 in an inhnehtawkpui a, Real tan hmahruaitu Barca nena an inkar tih zimna hun remchang a ni.

Mahse, Zinedine Zidane-a naute hian Athletic Bilbao-ah goal khung an harsat miau a, 0-0 a inhnehtawkin point khatah an lungawi a ṭul. Atletico Madrid erawhin an mikhual Real Sociedad lakah goal chhuah hmasa mah se tun hnaia harhna chang Antoine Griezmann hoin an comeback a, 2-1 in an chak.

Vanduai Barca

Barcelona-in Celta Vigo an mikhual hmain Valencia chu 1-1 in an inhnehtawkpui tawh a, Lionel Messi ball petin line pel ngei mah se goal-ah pawm a ni lo; Inrinni zanah pawh thawnthu a danglam tam lo. Luis Suarez goal khung ngei nia lang chu offside tiin pawmsak a ni lo a, replay ennawn se chuan referee khan a thutlukna a thlak ngei a rinawm.

Celta hian minute 20-naa Iago Aspas goal khung hmangin hma an hruai a, Barcelona-in Lionel Messi leh Luis Suarez hmanga an thungrulh hnuah Celta hian Maxi Gomez hmangin an si phurh an sut zo leh hram a ni–tun season-a Barca tana goal 17 khung tawh Messi-a'n a team chakpuina hun remchang nei mah se post a pet per a, pen li vel leka hla aṭangin a tauh out bawk.

Umtiti a inhliam

Barcelona defender Samuel Umtiti-a'n Celta Vigo goal hnihna tur a luh dawnin Aspas a umna lamah hliam a tuar a, kum 24 mi defender hi kar riat chhung a inlan thei lo ang. Barca coach Ernesto Valverde chuan, " 3-1 a chak theihna remchang kan nei a, mah se Umtiti inhliam kha kan talbuai phah a ni," a ti.

Barca-in chak result an hlawhchhuah zawh loh hnu lawkah Atletico Madrid erawhin tlawm an tum lo a, Willian Jose-a'n penalty hmangin Real Sociedad hma hruai pui mah se Filipe Luis chuan si phurh sutna goal a khung a, Griezmann chuan hun tawp nan minute hnih chiah a awm tawh tihin chakna goal a khung zui.

Real = 0

Real Madrid-in Athletic Bilbao khelmualah hnehna chan hun remchang nei mah se an hun ṭha neih an chhawr thei lo a, tlar hma lama an player chhuanvawr Karim Benzema leh Cristiano Ronaldo te chuan goal post an pet per ve ve–Real captain Sergio Ramos chu vawi hnih ngawt yellow card a chawi avangin hnawhchhuah a ni bawk a, Real keeper Keylor Navas-a'n Inaki Williams leh Aritz Aduriz te hun ṭha neih ṭha zetin a dang bawk.

Real Madrid coach Zinedine Zidane chuan, "Kan khelh dan avangin ka lawm a, goal kan khung loh avang erawh chuan ka hnual takzet a ni. Ka player-te khan an theihna zawng zawng an pe a, an phu tawk result an hlawh chhuak lo kha pawi ka tihpui takzet a ni," tiin a sawi.

Inkhel Result

Malaga 0–0 Levante

Barcelona 2–2 Celta Vigo

Atlético Madrid 2–1 Real Sociedad

Sevilla 2–0 Deportivo La Coruna

Athletic Club 0–0 Real Madrid