South Korea tan Brazil an thiam lua

Brazil-in world champion ni turin an ṭha tawk tih an pholang leh ta a, World Cup round of 16 meuh pawh Brazil tan chuan a awlsam takzet - Thawhṭanni zan khan South Korea chu 4-1 in an sawp a, quarterfinal an lut.

Hliam vanga group stage match hnih a khelh theih loh hnuah Neymar a lo kir leh ta a, Paris Saint-Germain forward a awm chuan Brazil tan lungphanna tur a awm lo tih a taka hmuhtir kan ni leh ta.

Selecao tan hian Neymar chuan penalty aṭangin goal khat a khung a, Vinícius Júnior, Richarlison leh Lucas Paquetá ten goal khat ṭheuh an khung bawk.

South Korea tan Paik Seung-ho chuan goal ṭha bik khung ve mah se scoreline timawitu chauh a chang a, Brazil-in quarterfinal-ah Japan ngamtu Croatia an tum dawn - final kalkawng an zawh zel e.

A hma mah mah!
South Korea-in World Cup last 16 paltlang turin Portugal, Ghana leh Uruguay awmna group meuh an paltlang a, an match tawp berah champion tura rinkai zinga mi Portugal an hneh theih avangin dah hniam chi an ni lo - Brazil tan chetsual theihna an ni.

Mahse, he Brazil team hian Neymar an nei leh tawh a, goalkeeper aṭanga tlar hma ber thlenga world class player an kawl avangin Asian football powerhouse tan Selecao an la sang hret!

Minute sarihna lekah Barcelona forward Raphinha chuan Real Madrid chhuanvawr Vinícius Júnior tan hna a thawhsak a, ṭha zeta ball a lakluh hnua a cross chu South Korea tlarhnung lamin an petchhuah theih loh avangin Vinicius ke bulah a tla.

Kum 22 mi forward hian, kum naupang tê chunga khawvela forward sawi hlawh ber pawl a nih chhan pholangin goal hmahruai khung nan a hmang a, Brazil bul ṭanna chauh a la ni!

Hei le Neymar
Neymar tel loa hmuhnawm tawk loa ngaih Brazil kha Neymar awm hnuah an hmuhnawm belhchhah sawt a, South Korea an vanduai a ni ber - goal an chhuah aṭanga minute li hnu lawkah penalty an chawi zui.

Tottenham Hotspur striker Richarlison-a penalty hlawhchhuah hi Neymar chuan goal-ah a chantir a, Brazil tana goal 76 a khungna chiah niin, ram tana goal khung hnem ber Pele nih rual turin goal khat khung belh chiah a mamawh tawh.

Kum 30 mi ni ve tawh Neymar hian ram tan inelna hrang hrangah match 123 a khel tawh a, tun World Cup-ah Pele record a nih rual ngei a rinawm hle - South Korea lakah pawh a che vel a hmuhnawm a, a dam tawh tih a hriat.

Neymar hi minute 81-naah lakchhuah a ni a, a thlak turin Rodrygo a rawn lut thei - hei hi Brazil squad chhahzia hrilhfiahna a ni a, Karim Benzema awm loh laia Real Madrid tana penalty pet pha Rodrygo-te meuh pawhin bul an ṭan phak lo.

A hming Richarlison
Brazil coach Tite hnuaia hmun pawimawh chang phak reng si, mahse, rin hlawh thei lo chu Richarlison a ni - Tottenham striker hi player thiam pangngai tak ni mah se a khelhpui Vinicius leh Neymar hming a langsar a, hei vang hian rin a hlawh lo bik pawh hi a awm lo hran lo.

Mahse, Richarlison hian Serbia laka an match hmasa berah goal hnih khungin, a goal pakhat zawk phei chu goal mawi bik a ni a, South Korea lakah penalty a hlawhchhuah bakah goal mawi bik a khung leh ta.

Minute 29-naah Richarlison hian a lu leh ke hmanga mawi zeta ball a sep kual hnuah Thiago Silva pek hman turin a tlan lut a, Chelsea defender ball pek chu an goal thumna ni turin goal-ah a chantir.

Brazil-in an duhtawk mai lo. Minute 36-naah ṭha zeta ball an lakluh hnuin Vinícius chuan South Korean defender-te pet khum chungin Lucas Paquetá tan a siamsak a, West Ham attacking midfielder hian ram tana a goal riatna ni turin a khung.

A thlawn mai maw
South Korea-in Son Heung-min an nei a, Tottenham Hotspur forward hi an innghahna a ni - mahse, Brazil-in tlarhmaah Son-a tlukpui an nei nual a, Taegeuk Warriors tan Brazil an la sang hret a ni.

Mahse, South Korea hian chance nei lo tawp an ni bik lo. Minute 76-naah Paik Seung-ho chuan penalty box pawn aṭangin mawi zetin a khung a, Jeonbuk Hyundai Motors midfielder goal khung hi keeper ṭha mi Alisson tan meuh pawh dan chi a ni lo.

Wolverhampton Wanderers forward Hwang Hee-chan pawhin goal khungna chance a nei a, mahse, Portugal laka chakna goal khungtu chance neih duhawm chu Brazil keeper Alisson chuan ṭha zetin a dansak.

Spurs forward Son Heung-min-a goal khung ngei tura ngaih chu Alisson hian a lo tibuai hman bawk a, South Korea-in Brazil an chhaih buai ve tho - quarterfinal lut ta lo mah se tun World Cup-a an khelh dan enin, Korean football-in hma a sawn takzet tih hmuh turin a awm.

Fak phu
Brazil tlarhmaah player langsar an tam em avangin, Selecao tlarhma chanchinin sawi a hlawh a, chutihruala goal khungtute tluk zeta fak phu an neih chu tlarhnungah an ding.

Liverpool keeper Alisson-a'n a rintlakzia a pholang nawn a, Brazil si ban nghak hi Alisson kher ni lo se South Korea lakah an khel ṭha viau chungin goal khat aia tam an chhuah ngei a rinawm.

Alisson thachhang dawl turin Manchester City keeper Ederson an la dah thei a, minute 80-naah Alisson thlaka lut Weverton pawh South American Team of the Year-a ṭum thum lang thei keeper a la ni tlat - Weverton-a'n khelmual a luh chiah khan Brazil squad-a player-ten tun World Cup-ah an khel kim chiah bawk.

Tlarhnung laiah Thiago Silva leh Marquinhos te an la inkawp thei a, Real Madrid defender Éder Militao leh Juventus right back Danilo ten an la venpui thei bawk a, an khel ṭha ṭhin takzet bawk - tun dinhmunah chuan Brazil-in champion rim an nam hle!