Italy-ah Ibra a kir leh ta

Thawhṭanni khan Zlatan Ibrahimovic chu Sweden aṭangin Italy-ah a thlawk lut leh ta a, ni 14 chhung khung hran phawt a ni ang - khung hran a nih chhung hian mimal training erawh a nei thei ang.

Serie A club-ten league khelh zawh ngei an duh, sorkar lamin May 18 aṭangin team training neih a phal dawn; kar hmasa aṭang khan player ṭhenkhat, mahni ram lama hawte chu Italy-ah an kir leh hlawm tawh a ni.

March 9 aṭang khan Serie A hi chawlh lailawk a ni a, team training neih phalsak ni mah se league an khel zo ngei ngei dawn em tih erawh a la chiang chung lo, beiseina nen an thlir mek.

AC Milan striker Ibra pawh inbuatsaih turin a kir a, chawlh a hman chhunga a hun hman dan chuan sawi zui a hlawh. Sweden-ah chuan inkharkhipna hi khawng taka kalpui a ni ve lem lo - Hammarby player-te zingah Ibra hi a training ve reng a ni.

Stockholm khawpui behchhana club din Hammarby-ah hian Ibra chuan neitu nihna 25% ngawt a nei a, training bakah match khelh chhin te pawh an nei a, a club-ah hian player ni chungin hun a hman chhunzawm mai ringtu an awm nual.

Hammarby sports manager Jesper Jansson chuan, "Engtik niah emaw chuan kan club tan Ibrahimovic a la khel mai thei, a chhana erawh Ibra chauhin a hre si," tiin a sawi. Swede striker erawhin Milan tana contract nei lai a nih thu a sawi a, a theih anga rei inkhelh a duh thu erawh a sawi tel bawk.

Kum 38 mi Ibra hian tun season tawp thleng chiah Milan tan contract a ziak, a hnu lamah chuan a duh lam a hawi thei dawn. Swedish league hi June aṭanga December thla chhunga khelh tum a ni - an ramah Ibra a inkhel a nih pawhin a mak lo ang.