Hei le - pa rorum, thin nel leh fing Enrique chu!
Nizan khan Spain chuan World Cup last 16 match Morocco nen an khel a, he thu buatsaih a nih lai hian result kan hre hman lo.
Hetihlai hian Spain boss Luis Enrique chuan streaming site Twitch kaltlangin fan-te nen inkawmna an nei a, zawhna awm apiang chhangin, fan-te nena an inkawmna hi ngaihnawm a tling.
Enrique-a'n heti taka twitch a hmang nasa hi mak tih a hlawh a, a bik takin World Cup boruak san vanglaia twitch kaltlanga fan-te nena an inkawmna an nei leh rih ṭhinte chuan mak tih a hlawh.
Mahse, Barcelona coach Enrique chuan, "Media hmaa ka inlan dan hmangin min teh fo a, mahse, tunah chuan engmah thup awm loin min hre thei - ka tan pawh chanchinthar, sawiselna leh min duhsakna hriat theihna remchang tak a ni," a ti.
Media nena an inkar
Kum 52 mi Enrique chuan, "Journalist ho ngaihdan ka chhiar ngai lo. Anmahni ka zah loh vang ni loin, thudik hre tura an hun 10% takngial pawh an pek ngai loh vang zawk a ni. Kei leh ka staff tena an hriat ang hi kan team chungchangah hian hriat an nei ngai lo hrim hrim.
"Thil thleng tur a thlen hnua sawi chu a awlsam alawm. Coach leh hetiang lam hnathawkte chuan thil thleng tur tam tak a awm theih laiin thutlukna an siam a ṭul ṭhin a, kan hnaa bet tel a nih avangin kei chuan hei hi nuam ka ti.
"Entirnan han sawi ta ila, substitution chungchangah thutlukna ka siam sual a, inchhir a, indawmkun ai chuan ngaihtuah ṭhat tur zingah ka dah mai a ni.
"A pawimawh ber chu enge thleng dawn tih hriat loh laia thutlukna siam hi a ni," a ti a, journalist-te chuan thil thlen vek hnuah "ta se" tia an sawi ṭhin avangin a lang awlsam niah a ngai.
Coach ṭha tak
Enrique chuan coach ṭha tak a nih thu a sawi riap mai - Spain boss chuan, "Mi naran ve mai ka ni a, mahse, coach ṭha tak niah erawh ka inngai - coach ṭha ni loah inngai ta ila, he hna hi ka thawk lo ang.
"Inel nuam timi ka ni a, harsatna a rawn awm hian inel nuam ka tihna hi a pung a, chu chu ka nih phung a ni a, mi a tak ka ni ringawt! Football hi ka thil tuipui ber, ka nunna ang hial a ni a, football ka khel theite hi ka lawm hle.
"Coach nih hi nuam ka ti a, mahse, a pressure erawh a awm ve ṭhin. Mahni induhkhawp lo fo ṭhin ka nih avangin coach ka nihna kawng tinrengah hian hmasawn ka la ngai. Player hnenah vawi hnih lai tihtur ka sawi a, a tih theih loh chuan player thiam loh ni loin ka thiam loh a ni - ka sawifiah tawk lo a ni mai. Chutiangah chuan a hriatthiam theih turin ka thusawi dan kalhmang ka thlak mai ṭhin," a ti.
Enrique chuan, "Coach ṭhenkhat, mahni hmingṭhatna leh kal zelna tur ngaihtuah vanga naupang hmasawnna tur daltu chu youth football-a awm tlak a ni lo," a ti bawk - Sporting Gijon-ah Enrique hi a cher leh tet em avangin a contract tihtawp a lo ni tawh a, midang chunga thleng atan a duh lo.
Mipuite tan
Enrique chuan player a thlan dan leh a team te khel tura a duh dan a sawi bawk. Spanish coach chuan, "A theihna avanga player kan thlang a nih chuan, mize ṭha takin chu chu a zui ngei tur a ni. Mi zawng zawngin thu an awih a ngai, ka ti hran lo. A nihna takah chuan mize hran nei hi ka duh ve tlat zawk - ram tana a theihna zawng zawng hlantu, tun atan mai ni lo, nakin zel atan pawha tha thawh thei ka duh.
"Ball chan tam kan duh a, kan ball chan min chhuhsak an tumna lamah kan khingpuite chu chau ṭhin se, ka duh. A tir aṭanga a tawp thleng inkhel thunun ka duh a, kan tlawm a nih chuan ka thiam loh a ni mai. Tlarhnung aṭanga khelh chu a risk a sang tih ka hria. Mahse, chu chu kan balance thei a nih chuan, khingpui tana hlauhawm ber a ni thung.
"Ball ken nuam ti em em player zel ka thlang. Mi tam tak chuan ball chan rualin hla taka thlawh tur emaw an ti ṭhin a, mahse, chu ball vek chuan rawn kir turin second 20 bak a mamawh lo. Chak duh luatah football hi 'show' a ni tih kan theihnghilh fo ṭhin - ṭha taka khel chunga hnehna chan dan tam tak a awm a, player leh inkhel entu tana nuam ve vein a khelh theih.
"Kei chuan football chungah hian ka rinna ka nghat reng fo ṭhin. Coach-in a hriat hmasak ber tur chu hei hi show a ni a, stadium-ah mipui 50,000, 100,000 ten inkhel an en a, mi maktaduai telin in lam aṭangin an lo en bawk - kan tan anni hi an hlu a, inkhel hmuhnawm lo kan entir tur a ni lo," a ti.
An vaia pawimawhna
Football team-in hlawhtlinna an chanin coach leh player an langsar ṭhin a, Enrique erawhin anni bakah mi pawimawh tam tak an awm thu a sawi. Enrique chuan, "Coach leh player 26 bakah hian mi pawimawh tak tak 60 vel an la awm. Physio, doctor, team manager, cook leh zin veivahna buaipuitu an awm a, chhungkaw lian tak ang kan ni," a ti.
2014-15 season-a Barcelona tana treble champion nomawi chawitu Enrique hian chhungkua a ngai pawimawh takzet a, a fanu Xana chu August 2019 khan kum kua mi lek niin, cancer vangin a chân a, a chanchin a la sawi fo ṭhin.
Spain-in Germany an hmachhawn dawn khan, Xana kha la dam ta se kum 13 a ni chiah ang. Enrique chuan, "Ka hmangaih, khawiah pawh awm la, hmangaihna kan hlan a che. Hun duhawm tak lo hmang la, kan hmangaih reng ang che," a ti a, a video chu instagram lamah a tarlang.
Player a nih laia Real Madrid leh Barcelona tana lo khel tawh Enrique chuan, "Kan harsat lai leh hun thim berah pawh chhungte leh ṭhian ṭha chuan min hawisan ve ngai lo a, chu chu team chakna hnar pawh a ni. Hei hi hre reng rawh - team 32 zingah hian pakhat chiahin nomawi an hawn dawn a, engkim tawp hun pawha kan tana awm tur chu chhungkua an ni," a ti.
Player-te hlimna
Pa rorum tak anga lang Enrique hian a player-te chu hlim taka an awm a duh thu a sawi a, a inla 'strict' lem lo. Enrique chuan, "Player-ten i hahdam tih an hmuh chuan anni pawh rilru hahdam takin an awm ve mai ṭhin.
"Ka player-te hi khelmual pana bus-a kan chuan lai te leh dressing room-ah te hian phone hmangin hla ngaithla se ka duh ṭhin - football hi intihhlimna mai alawm a nih! Player ka nih ve hun lai kha chuan mi tam takin hetiang hi an ngaithiam lo ṭhin.
"Kan vaia ngawi ṭhiap chunga kan awm a nih chuan, 'Sa talhna hmuna kal tur em ni kan nih' tiin ka player-te ka hau ṭhin. Football hi nuam ti takin lawm ila, ka player-te hi hlim taka nui bawk bawkin, hlim takin lam se ka duh a ni.
"Player ṭawngṭai ṭhin miin ṭawngṭai a duh chuan tih tir mai ila, insawrbing duh chu insawrbing se la, mahse, kan inkhelh hmate chuan duh leh nui ila, fiamthu thawh ila, enge pawi ang?" a ti a, nuam ti taka football khawvel hmachhawn chu a duh dan a nih thu a sawi.
Insawizawi ṭhin
Kum 52 mi ni tawh mah se Enrique-a'n insawizawi nuam a la ti reng a, ni tin infiamna pakhat tal tia hun hmang lo chuan ni a vui liam ngai lo - player a nih laia Spain tana vawi 62 inlana goal 12 khungtu hi a fakawm hle.
Barcelona B team aṭanga a coaching career ṭantu Enrique chuan, "Ka thawh veleh hian infiamna lam hawi, engemaw, pakhat tal ka tiziah ṭhin. Engmah ti loa ni vui liam ka nei ngai lo.
"Darkar chanve a ni emaw, minute 15 lek emaw pawh ni se, engemaw tal ka tiziah ṭhin. Hna ṭha taka ka thawh theih nan a pawimawhah ka ngai a, keima nun hrim hrim hi a hlim phah ṭhin. Nun hrisel leh duhawm neih nan a ṭha," a ti.
Footballer mai ni lo, infiammi tam takin, inkhelh an chawlhsan rualin insawizawi an bansan a, an nun an uluk lo ṭhin hle - Enrique erawh a danglam a, hrisel taka hun hman zel a la duh tlat.
Duh duh ei ang!
Enrique-a'n insawizawi pawimawhzia a sawi a, hetihrual hian Spain coach hi a in 'diet' ngai miah lo thung! Enrique chuan, "Ka in diet ngai lo a, ka ei châk chu ka ei mai ṭhin a, ei tur hrisel ka ei thung," a ti a, in diet lo mah se a ei tur lam a uluk niin a lang.
AS Roma boss hlui chuan, "Nimin lawk pawh khan ka player-te chuan sa hemin, an ei a, an duh a nih chuan uain tlem pawh an in thei ang. Mahse, tui an in tlangpui zawk.
"Dan zawm hleihtheih loh, âtthlak tak duan ka tum lo. Player-te hnenah beer in a theih loh thu sawi hi ka tan awmzia a awm lo - a haw ang a, a duh chuan panga pawh a in thei," a ti a, thil zawng zawng a ven theih loh thu a sawi.
"Mi zawng zawng ngaina anga lan hi ka tum lo, tumah dik famkim kan awm hleinem," titu Enrique hian World Cup nomawi an chawi chuan, fan-te hnenah an zawhna zawng zawng chhan a intiam.