Croatia-in Japan an thawn haw

Germany leh Spain hnehtu Japan-in 2022 FIFA World Cup second round-ah team ṭha an ni tih lantir chhunzawm mah se anmahni aia vannei zawk an tawng. Thawhṭanni zan khan Al Janoub Stadium-ah Japan leh Croatia an inkhel a, hun pangngaiah 1-1 a inhnehtawkin extra time-ah Zlatko Dalic kaihhruai Croatia 3-1 in an vannei ta zawk.

Japan hian Daizen Maeda hmangin minute 43-naah an khung hmasa a, Croatia-in minute 55-naah Ivan Perisic-a tauh luh ṭha zet hmangin an sut. Hun pangngai zawh hnua extra time minute 30 khelh hnuah pawh goal a luh belh lo a, penalty shootout-ah Dominik Livakovic-a'n penalty vawi thum dangin Croatia a chakpui. Quarterfinal-ah Croatia hian champion rinkai Brazil an hmachhawn ang.

Japan an hmuhnawm
Japan-in Germany an hneh hnuah Costa Rica an hneh lo a, Hajime Moriyasu hote hi eng ang chiaha ṭha nge tih hriatthiam an la har. Amaherawhchu group match hnuhnung berah Spain an hneh thei a, team ṭha an ni tih a chiang.

Al Janoub Stadium-ah Japan-in inkhel nung tak an lantir a, Croatia aiin ball chang tlem mah se goal hmaah an hlauhawm zawk. Mual ding lam sira awm Junya Ito ball cross chu hmuhnawm a tling a, Croatia tlarhnung tan buaina a ni bawk.

Japan-in halftime hma minute hnih lek a awm tawh tihin Maeda hmangin hma an hruai a, ball chang tlem zawk mah se goal khung hmasa zawk nih hi an phu.

Tawnhriat nei ṭha Croatia
World Cup 2018-ah Croatia hian final lut mah se Qatar-ah erawh khelh ṭhat tak tak an la nei lo a, chutihrualin khelh dan nghet erawh an nei thung. Croatia tan Ivan Perisic chu player pawimawh a ni a, Arsenal defender Takehiro Tomiyasu tihsual zarah goal hmahruai a khung teuh hle.

Croatia tlarhmaa Perisic kawppui Bruno Petkovic leh Andrej Kramaric te an hriam tawk lo a, group stage-a Morocco leh Belgium laka goal an khung lo kha thilmak a ni hran lo.

Japan-in goal an khung hmasak avangin Croatia an buai a, mahse second half-ah player ṭha danglamna a lang. Minute 55-naah Dejan Lovren ball vawrh luh ṭha pangngai chu Perisic-a'n ṭha zetin goal kilah a tauh lut - goal ṭha bik a ni.

Goal khat ve ve an khung hnuah team pahnih an fimkhur a, inkhel hmuhnawmna a tlahniam. Chutihrualin goal chance hmuh tur erawh a awm tho a, Japan tana Daichi Kamada khung teuh ang thoin Croatia captain Luka Modric pawhin a khung teuh.

Goal dang a luh belh miau loh avangin penalty hmangin chinfel a ṭul a, tawnhriat nei ṭha zawk Croatia an huaisen zawk. Japan tana pet hmasa bertu Takumi Minamino-a'n a pet ṭha tawk lo a, a hnung zuitu Kaoru Mitoma pawhin beisei a pha lo. Takuma Asano-a'n goal-ah chantir mah se captain Maya Yohsida ber pawhin a hlah - Croatia keeper Livakovic a chet ṭhat rualin Japanese player-te an pet ṭha lo.

Chutihrualin Croatia tana hlahtu Marko Livaja chu penalty hlah zinga pet chhe berah a chhal theih. Croatia tana pettu dang Nikola Vlasic, Marcelo Brozovic leh Mario Pasalic ten an khung vek a, penalty shootout-ah 3-1 a chakin quarterfinal an lut.

Croatia hian kum 2018-a final an thlen ṭum pawh khan second round-ah Denmark chu penalty hmangin an hneh a, quarterfinal-ah Russia chu penalty hmang bawkin an hneh - World Cup-ah ṭum thum penalty shootout an hmachhawn tawh a, an chak vek. Japan erawh kum 1998 aṭangin World Cup la khel ziah mah se second round aia sang an a la thleng lo.