A changtupa Livakovic

FIFA World Cup ṭum khatah hian penalty vawi thum save thei goalkeeper pathum an awm ta chiah a, Japan laka penalty vawi thum dangtu Dominik Livakovic chu a pathumna a ni. Dinamo Zagreb keeper Livakovic hian Croatia chu quarterfinal a hruai thleng.

Kum 27 mi Livakovic hian Japan lakah ṭum thum penalty a dang a, Croatia-in 3-1 in penalty shootout-ah hnehna an chang.

Dinamo Zagreb keeper Livakovic chuan, "Croatia tih dan a ni a, ka sawi awmzia chu kum li liam ta khan inhre thei ang. Kan hmaa mite tih dan ṭha ka chhunzawm a ni," tiin a sawi.

2018 World Cup-ah khan Croatia keeper Danijel Subašić chuan Denmark an hneh ṭumin penalty vawi thum a dang. Tun ṭumah hian Livakovic hian chiang takin Takumi Minamino, Kaoru Mitoma leh Maya Yoshida te penalty pet a dang a, Spain leh Germany hnehtu Samurai Blue an hneh.

Croatian keeper Subasic leh Livakovic bakah hian kum 2006 khan Portugal-in England an hneh ṭumin keeper Ricardo chuan ṭum thum tho penalty a dang.

Croatia coach Zlatko Dalic chuan, "Pathianni khan penalty training kan nei a, a dang ṭha ṭhin hle. A chungah rinna ka nghat a, ka rinna min tih hlawhtlinsak a ni," tiin inkhelh banah a sawi.

Japan goalkeeper Shuichi Gonda khan tun World Cup-ah Ilkay Gundogan-a penalty pet a dang thei lo a, Croatia tana penalty pet goal lotu Marko Livaja khan goal ban a pet per bawk. Chutihrualin Gonda hian a career-ah penalty vawi 10 a dang tawh a, J League-ah vawi kua dangin pakhat dang leh Japan rama knockout inelna a ni.

Croatia hero Livakovic hian penalty vawi 14 a dang tawh thung a, chutihrualin vawi 40 zet penalty aṭangin a chhuah. Livakovic hian penalty a hmachhawn hnuhnung chu Champions League niin a chhuah vek a, goal hnih hi AC Milan striker Olivier Giroud khung a ni. Thawhṭanni zanah erawh Livakovic a che ṭha a, vawi li a hmachhawnah vawi thum a dang.

Last 16 - December 5, Thawhṭanni
Japan 1 - 1 Croatia
Penalty Shootout-ah Croatia 3-1 in an chak
JPN : Daizen Maeda 43'
CRO : Ivan Perisic 55'

Japan Croatia
Takumi Minamino X Nikola Vlasic G
Kaoru Mitoma X Marcelo Brozovic G
Takuma Asano G Marko Livaja X
Maya Yoshida X Mario Pasalic G