FIFA-in Uruguay player an chhui

World Cup aṭanga an tlak danah Uruguay an lawm lo a, match hnuhnung ber an khelh zawh hnuah player ṭhenkhat chu referee lakah mawi lo takin an che a, khelmual an chhuahsan dawna Edinson Cavani chet dan chuan sawi zui a hlawh bawk.

Uruguay hian an group match hnuhnung berah Ghana 2-0 in an hneh, mahse inkhel dangah South Korea chuan Portugal an lo hneh ve bawk si a, goal difference inangah goal khung hnem zawk Korea an tlang.

World champion hmasa ber Uruguay khan hun tawp dawnah penalty hlawh chhuakah an inngai, mahse striker Cavani chu a beisei ang pek a ni lo, penalty pein goal khat khung belh thei ni se last 16 an lut thei dawn a ni.

Inkhelh banah Jose Maria Gimenez, Edinson Cavani, Fernando Muslera leh Diego Godin te chu an thinrim an insum zo lo. CCTV aṭanga a lan dan phei chuan Cavani hian kelmual sira VAR chu a namtlu hial.

Thil thleng hi FIFA chuan a chhui chiang mek a, player chhui bik palite hming pawh hi a tilang. Hremna hmachhawn thei dinhmunah an ding mek a, chutihrualin hremna an pe dawn a nih pawhin insawifiahna hun an siamsak rin a ni.