Germany sporting director Bierhoff a bang

2022 FIFA World Cup-ah Germany-in knockout stage an thlen zawh loh avangin Germany sporting director Olivier Bierhoff chu a hna chelh lai aṭangin a bang.

Bierhoff hi 1996 European Championship-a Germany tana chakna goal khungtu kha a ni a, AC Milan striker hlui hi Germany FA-ah hian kum 2004 aṭangin a thawk ṭan. Jurgen Klinsmann-a'n Germany head coach hna a thawh khan khan Bierhoff hi manager a ni.

Kum 54 mi Bierhoff chuan, "German FA president Bernd Neuendorf hnenah ka thutlukna ka hrilh a, Germany-in bul an ṭan thar leh nan kawng ka lo kian hi a ṭul a ni," tiin a sawi.

German FA-in euro maktaduai 150 man DFB Academy building an sakna kawngah Bierhoff hi mi pawimawh a ni a, he coaching hmunpui hi Frankfurt-ah a awm. Khelmual pawn lamah Bierhoff hian hnathawh ṭha tak tak nei mah se inelna lian hnuhnung pathumah Germany an chet ṭhat loh avangin sawiseltu a ngah hle.

Bierhoff chuan, "German FA leh national team-in hma an sawn theih nan thinlung leh tih takzetin ka thawk. Thutlukna ṭha tura kan ngaih a ṭha ta lo a, Russia leh Qatar-a kan che ṭha lo hi pawi ka ti takzet. Kan result ṭha loah hian kei aia hrehawm ti hi an awm chuang ka ring lo a, mawhphurhna ka lak ngam a ṭul a ni," tiin a sawi.

Germany hian kum li liam ta khan Russia-ah South Korea hneh loin an tla a, Qatar-ah Japan hneh loin an tla leh bawk. Bayern Munich coach hlui Hansi Flick-a'n reuslt ṭha nei lo mah se ban a tum lo. Flick chuan ,"Keima lam aṭang chuan thawh chhunzawm lohna chhan tur ka hre lo. He hna hi nuam ka ti a, rang takin kan insiamṭha thei ang," tiin a sawi thung.