India-in phuba an la thei dawn em?

India leh Bangaldesh chuan vawiin chhun dar 11:30 hian ODI match thum an khelh tura vawi hnihna chu Sher-e-Bangla, Mirpur-ah an khel dawn. ODI match hmasa berah mualneitu Tigers hian hnehna an chan avangin Men in Blue tan series la turin chak ngei ngei a ṭul.

Pathianni inkhelah Bangaldesh-in vawm hmasak an thlang. India tan KL Rahul-a'n 73 runs siam mah se thlawptu ṭha a nei lo a, India hian over 41.2-ah 186 runs siamin an thi fai vek.

India hian captain Rohit Sharma (27) leh Shikhar Dhawan (7) te bul an ṭantir a, an hnuaia awm Virat Kohli (9) leh Shreyas Iyer (24) te pawhin run tam an siam lo. KL Rahul hi panganaah awmin opener a nih loh ṭumah pawh a rintlak hle.

Ṭum dang ang thoin India tailender te an che chhia a, Bangladesh laka over 41.2-a thih fai vek hi India tan zahthlak a tling. Bangladesh tan target awlsam ni mah se chak lo thei dinhmunah an ding. Litton Das (41), Mehidy Hasan (38*) leh Shakib Al Hasan (29) te an che ṭha a, over 46-ah 187/9 runs siamin an chak hram.