Player of the Year atan Axelsen

Badminton World Federation chuan Thawhṭanni zan khan, tun season atan player che ṭha bikte chawimawina hun a hmang. Bangkok khawpuia award sem chhuahah hian Viktor Axelsen chu BWF Male Player of the Year atan thlan a ni.

Denmark tlangval Axelsen hian kuminah nomawi pakua ngawt a chawi a, a vawi hnih nan World Championship-ah a champion bawk. Olympic gold medal leh world champion lai a nih bawk avangin a chawimawina dawn hi a phu hle.

Hmeichhe lamah pawh a vawi hnih nana world champion ni thei Akane Yamaguchi chu BWF Female Player of the Year award atan thlan a ni a, lawmman dawng tur hian player ṭha An Se Young leh Tai Tzu Ying te a khum.

Japan rawlthar, kum 21 mi chauh ni chunga Vietnam Open Super 100 title la thei, tournament a khelh dang palia final lut thei bawk Kodai Naraoka chu Eddy Choong Most Promising Player of the Year atan thlan a ni bawk.