Premier League Club Bihchianna Liverpool - English club zinga Europe-a ropui ber

Liverpool FC hi eng ang chiaha ropui nge tih chu an nomawi chawi tawh zat hian a sawifiah. English club hian European Cup paruk, UEFA Cup pathum, UEFA Super Cup pali, FIFA Club World Cup pakhat, League nomawi 18, FA Cup pasarih leh Community Shield 15 nomawi an chawi tawh a, an sulhnu ropui tak avang hian khawvela club ropui ber zingah chhiar tel an ni.

Liverpool khua hi Liverpool FC (1892) vangin a lar belh a, amaherawhchu Reds hma hian Everton FC (1878) leh Liverpool Ramblers AFC (1882) te din a ni tawh. Liverpool Ramblers AFC hi Liverpool khaw club aṭanga FA Cup khel hmasa ber a ni a, tun thlengin la awm mah se amateur club niin friendly match bak an khel lo.

Liverpool FC leh Everton FC erawh Premier League ti hmuhnawmtu an ni a, club pahnih inhmachhawn hi Merseyside Derby tih niin an inhal hle. Toffees hian kum 1982 khan Anfield chhuahsanin Goodison Park-a insawn turin thutlukna an siam a, Anfield ram neitu John Houlding-a'n a pawm thei lo.

Everton committee leh John Houlding te thu an inhmu lo a, sumdawng hausa leh politician Houlding-a'n khelmual atana Anfield hmang thei tur club a din. Reds hi a tirah chuan Everton FC and Athletic Grounds Ltd tih a ni a, March 1892-ah Liverpool FC tihin an thlak. Thla thum hnuah Football Association hnuaiah an inziaklut.

Liverpool hian season hmasa berah Lancashire League-ah an champion nghal a, First Division khel turin season khat bak an mamawh lo - kum 1894 khan England-a football inelna sang ber an khel ṭan. Kum 1901-ah a vawi khat nan First Division-ah an champion a, club-in ropuina a chan tak tak erawh Bill Shankly hnuaiah a ni.

Kum 1959 khan Liverpool-in manager atan Bill Shankly an lalut a, Scottish manager hian Second Division-ah 1961–62 season khan champion puiin First Division khel turin a tlinpui. Inelna sang berah pawh a ti kimtu ni ringawt loin club ṭha ber zinga mi an ni zui. 

Shankly hnuaiah Liverpool-in First Division-ah vawi thum (1963–64, 1965–66, 1972–73) a champion pui a, FA Cup-ah pawh vawi hnih (1964–65, 1973–74) an champion a, 1972–73 season-ah UEFA Cup-ah an champion. Reds-in Shankly an neih hnuah khawvel club ropui zingah an tel ṭan a, an hawi kir tawh lo.

Scottish manager Shankly hian 1974 FA Cup nomawi an chawi zawhah a chawlh tur thu an puang thut a, a hmunruak zau tak hnawh khah a huphurhawm. Mawhphurhna hautak zet chu player ang pawha Liverpool legend ni pha Bob Paisley kutah a tla a, ani hi Shankly hnuaiah assistant manager chelhtu a ni.

Paisley-a'n insit tak chungin Liverpool enkawl ṭan mah se Shankly ai mahin a hlawhtling zawk tihin a sawi theih. English manager hian Reds hi First Division-ah vawi ruk, League Cup-ah vawi thum leh Charity Shield-ah vawi ruk a champion pui a, a ropui thlawt. 

Tun thlenga Liverpool ṭantute inchhuanna chu Europe-a nomawi an chawi tam hi a ni a, Paisley hnuaiah hian European Cup-ah vawi thum zet an champion a, UEFA Cup leh UEFA Super Cup-ah vawi khat ve ve nomawi an chawi bawk.

Liverpool leh nomawi chu thil inzawm tlat a ni chho a, Paisley thlaktu Joe Fagan pawhin First Division, League Cup leh European Cup-ah vawi khat 

ṭheuh a champon pui. 

Liverpool player ropui Kenny Dalglish pawh manager angin a ropui tho a, a kaihhruaina hnuaiah Reds hi First Division-ah vawi thum a champion pui a, FA Cup-ah vawi hnih leh League Cup-ah vawi khat nomawi a chawi pui bawk.

Amaherawhchu Premier League ṭan hnuah ngai an awh leh tawh lo a, tun thlengin league nomawi an chawi leh tawh lo. Kumin hian Jurgen Klopp hnuaiah nomawi chawi ngei tura ngaih an ni a, coronavirusvangin an dinhmun a chiang ta lo.

Liverpool ṭantute thinlungah Steven Gerrard-a'n hmun pawimawh a chang a, Jamie Carragher leh Robbie Fowler te lam hmaih a thiang lo.

Captain fantasic tiha sawi ṭhin Gerrard hian Premier League-ah assist vawi 92 a nei a, club record chelhtu a ni. Stevie G hian vawi 504 a inlan a, a tluk loh chu Jamie Carragher (508) chauh a ni a, Reds chakpui tam lamah pawh Gerrard-a'n (255) Carragher (264) chauh a tluk lo. Goal khung tam ber erawh Robbie Fowler a ni a, goal 128 khungin Gerrard aiin goal riat chauhin a khung tam.

Stevie G hi Liverpool khawchhak lama khaw pakhat Whiston-ah a piang a, a pa hi Liverpool FC ṭantu ruhkawl a ni. Gerrard chuan, "Ka ṭhianpa hian Robson (Manchester United captain hlui) jersey a nei a, hak ve ka dil. 

Ka Liverpool jersey chu phelhin Robson-a kawr ka ha a, inrintawkna ka ngah sawt. Darkar khat vel ka ha a, Robson angah inchanin huai takin ka khel a, ka tackle nasat bakah goal ka khung bawk. 

Ka ngaihtuahnaah chuan Robson-a hming a chuan avangin England hero kawr ka haah ka inngai a, United jersey lam ka ngaihtuah lo," tiin a naupan lai chanchin a sawi.

Gerrard-a che vel hi a pa Paul Gerrard a hmu fuh. Stevie G chuan, "Ka pa chuan thinrim takin min ko haw nghal a, 'Engvangin nge Manchester United jersey i hak?' tih chu a zawhna hmasa ber a ni. Insawifiah tumin Bryan Robson-a jersey alawm tiin ka chhang a, ka pa erawh a thusawiah a chiang. 'I hriat zau hret a 

ṭul' tih a sawi a, engkim a chiang. Kum naupang te ni mah ila ka pa khan United jersey ka hak avangin min hnawhtchhuak duh hial ang," tiin a sawi.

Paul-a'n a fapa Manchester United ho turin a zirtir a, Liverpool player ropui ni turin a fuih tel. Gerrard hian hlawhtling takin football a khel a, Liverpool FC ropuina chu Champions League (1), UEFA Cup (1), FA Cup (2) leh League Cup (3) hmangin a belhchhah a, Manchester United kawr a ha nawn leh tawh lo!