Dutch team hmachhawn tur Argentina bihchianna

Qatar World Cup chuan a vawr tawp a thleng chho mek a, champion tura rinkai zual zingah tla an la awm lo tiin a sawi theih. Quarterfinal aṭang erawh chuan a ṭha ho pawh an tla phak phak tawh dawn, a thiam bikte tan chauh hmun a awm tawh dawn a ni.

Argentina leh Netherlands inkhel tur hi ngaihven hlawh zual zinga mi a ni dawn. Lionel Messi awmna hi champion tura rinkai zinga mi an ni a, coach ṭha Louis van Gaal leh a naute paltlang turin an ṭha tawk reng em tih chu khawvel mipui hriat chak a ni.

Tlarhnung lam
Hun rei tak keu let kher a ngai lo, a bik takin Messi awm chin chhut ila. Argentina hian goalkeeper ropui tak tia sawi tur an nei lo a, defender ṭha leh khawvel huap hming lang, team innghahna le thlamuanpui tham pawh an nei ngai meuh lo.

Lionel Scaloni hun a rawn inher chhuak a, coach naupang tak hian si ban nghak turin Emiliano Martinez a ring ngam. A goal keeper ṭhenkhat inhliam karah Martinez hian hun remchang a nei hlauh a, midang tan khelhna hmun a siamsak tawh lo a ni ber.

Arsenal keeper ṭhin hian inkhelh tam a duh avangin Aston Villa a pan a, a duh ang ngeiin a khel tam. Ram tana khelhna hmun pawh a chan phah hial. Copa America an champion theih chhan pawh kha a ni, final an luh theih nana a penalty dan zozaite kha sawi hmaih a rem lo.

Martinez hi khawvel goalkeeper ropui leh ṭha zinga mi a ni kher lo ang, mahse tun dinhmuna an boruak leh khelh dan thlir chuan, ani aia ṭha tur hi Argentina tan chuan an awm chuang lo, boruak sang a ngam em em te hi a danglamna a ni.

Scaloni-a'n team a rem bul ṭanna pawimawh chu defence a ni. Tawnhriat nei ṭha Nicolas Otamendi kawppui tur zawn chu a hna pawimawh hmasa a ni a, chhanna a hmuh tak chu Cristian Romero a ni - Atalanta tana khelh lai aṭangin ram tana khel turin a ring ngam.

Tunah chuan Romero hi Tottenham tan a khel mek, World Cup tirah khan hliam vangin ngai a awm lo; Saudi Arabia lakah a mualpho a nih kha. Mahse, a hnu lamah rin a hlawh ta tho a, tun hma zawng aia tlarhnung an neih khawng tak avangin beisei an nei sang.

Ball semtu
Argentina midfield khaikhawmtu chu Rodrigo De Paul a ni. Atletico Madrid midfielder hian club lamah season a hmang ṭha tawk lo, hei hi ram tana a khelh danah pawh a lang - group match hmasa lamah tih sual a ngah, a ball hloh a pawi ṭhin bawk.

Rilru paukhauh a nihna a lang a, match an khel tam tual tual a, tunah chuan De Paul a inringtawk takzet leh tawh. Australia an hneh ṭum phei chuan ball semtu pawimawh a nih bakah defender tha ti chaktu a ni, Argentina mipui te beisei De Paul kha a lang leh tawh.

De Paul bula ding Enzo Fernandez hi Benfica tana khel lai niin, player thluak fim kan tih ang chi kha a ni. Inkhel kalphung a man thiam hma hle a, hnai te te a ball pass thiam chi a ni. Ani hi an hmatawng te tana ball sem chhuaktu pawimawh a ni.

Premier League en ṭhinte chuan Alexis Mac Allister kan hre ṭheuh ang. Brighton midfielder hian season a hman ṭhat avangin an ram tan pawh a khel phak a, a tirah rinrawl ni nghal lo mah se tun hnai a khelh dan thlirin quarterfinal-ah pawh hmun pawimawh a chang ang.

Coach Lionel Scaloni-a'n World Cup tir lam khan a midfield a siksawi nasa. Group match pawimawh leh last 16-ah erawh De Paul, Mac Allister leh Fernández ten bul an ṭan rual ṭhap, harsatna eng emaw tak a thleng a nih ngawt loh chuan an inkawp chhunzawm a rinawm.

Tlar hma
Lionel Messi a awm a, a hming chauh pawh hi thlamuanpui tham a ni. Paris Saint Germanin forward hi kum 35 mi ni tawh mah se, tun World Cup khelh laia player hmuhnawm berte zinga mi a la ni thei - goal thum a khung leh der tawh.

Argentina coach Scaloni pawhin Messi pawimawhna a hria a, an captain khelh dan mil thei tur ang berin team pawh a siksawi mai ṭhin. Messi thlawp tur hian Julian Alvarez chu a duh ber rih niin a lang, quarterfinal-ah pawh Manchester City rawlthar nen an inkawp a rinawm.

Alvarez hi a che rangin ball a thiam a, kum 22 mi chauh a la nih avangin a la tlan tam thei bawk. Inkhel boruak sangah erawh fiah a la ni lo, tawnhriat nei ṭha Angel di Maria nen an dinhmun inthlak thei reng chu a la ni ve bawk.

Sevilla attacking midfielder Papu Gomez-a'n Australia lakah hmun pawimawh a chang, ani pawh hi kum 34 mi a ni tawh. Messi leh Gomez an lut rual a nih chuan Alvarez a tel a ngai dawn, a tlan tamna leh chet ranna an mamawh.

Argentina hian Lautaro Martinez an nei bawk, ani hian last 16 inkhelah beisei a phak lo - goal khung ngei theihna tur nia lang a hlah nual, coach tan bul ṭan tura rin ngam a harsa tawh mai thei, bench aṭang erawhin a luh a rinawm.