Tennis coach Bollettieri a thi

Player ropui tam tak lo enkawl a, hlawhtlinna chi hrang hrang lo chanpui tawhtu Nick Bollettieri chu December 5, Thawhṭanni zan khan a thi - kum 91 mi a ni.

Bollettieri hi US rama Italian raltlan fapa a ni a, a tirah chuan sipai a ni. A hna a chawlhsan hnuin tennis zirna a buaipui a, hei hi khawvelin amah a hriatrengna tur chu a ni a, a hnathawh a ropui hle.

World number 1 ringawt pawh player 10 a enkawl tawh, a player enkawl zingah Andre Agassi, Serena Williams, Venus Williams, Monica Seles leh Maria Sharapova te chu a langsar zual an ni.

Grand Slam vawi riat champion Andre Agassi chuan, "Mi tam tak duhthusam tihhlawhtlinsaktu, kan suangtuahnate a tak rama min hruai thlengtu Nick Bollettieri a thi hi pawi ka ti a, awih mai pawh harsa ka ti hle. Ka chunga i thil tihte avangin ka lawm e," tiin a coach hlui a thlah.

Bollettieri hi tennis player ropui a ni lo a, inelna sangah pawh a inlan phak lo hrim hrim. Mahse, inkhelh dan phung hria leh player training pe thiam bik a ni tlat a, a inkhelh aiin zirtir hna chu a hlawhtlinpui.