Poland khelh danin Lewy hmalam hun a hril

Robert Lewandowski chuan Poland khelh dan hmangin a hmalam hun a hril thu a sawi. Poland hian group match hnuhnung bera Argentina an hmachhawn ṭum leh last 16-a France nena an inkhelh ṭumin goal venhim hna an thawk a, an chak lo ve ve.

Khawvel striker ṭha ber zinga mi Lewy hian Les Bleus an hneh loh ṭumin goal a khung tho a, a goal khungna erawh penalty a ni. Barcelona striker Lewy hian ball ṭha a hmu meuh lo a, coach Czeslaw Michniewicz khelhtir dan hmangah Poland captain hi a lawm lo.

Kum 34 mi Lewy chuan, "2026 World Cup chu a la hla hle. Kan tling ta a nih pawhin nuam tia kan inkhelh a ngai. Goal khung tumin nawr ngam ila, inkhelh dan hmang a danglam ang. Goal venhim tum ringawt chu a nawmna a awm lo," tiin a sawi.

Poland coach Michniewicz chuan, "Coach ka nih angin Lewy hmalam hun sawi tur ka ni lo. Kan captain a ni a, thutlukna siam thei tur a ni. Tuna a khelh dan anga a khelh chuan hun rei tak captain a la ni thei ang," tiin a sawi thung.

Lewandowski hian Poland tan September 2008 aṭang khan khel ṭanin match 138 khel tawhin goal 78 a khung tawh a ni.