Premier League kalpui dan tur kawng dap zel
Covid-19 vanga buaina kal zelah United Kingdom sorkarin June 1 hmain England-ah inelna lian tham huaihawt phal a ni lo tih an puang a, chutihrualin Premier League khelh
ṭan leh theihna tura ruahmanna 'Project Restart' angin June 12-ah inelna ṭan theih a beiseiawm.
UK prime minister Boris Johnson chuan, "Entu awm loa inkhelh tur pawh ni se infiamna hian ramchhung mipuiin an mamawh beiseina leh phurna a siam ngei ang," tiin infiamna an dah pawimawh thu a sawi.
Premier League chuan May 18, Thawhṭanni hian meeting an nei dawn a, Project Restart chungchang an sawi ho dawn. Cricket lamah chuan England and Wales Cricket Board-in thutlukna siamin July 1 hmain inelna buatsaih a ni dawn lo a, British horse racing lam chuan June 1 aṭanga ṭan an tum thung.
Premiership Rugby-ah round kua khelh hmabak a ni a, July thlatir lamah ṭan theih an inbeisei. Formula 1 pawhin Silverstone-ah July 19 leh 29-ah intlansiak buatsaih theih an inring bawk.
Hmabak Refund
Premier League hi an ṭan thei ta reng a nih pawhin Premier League club-te hi domestic leh international broadcaster lakah pound maktaduai 340 pek let a ngaih theih thu an hrilh.
Inelna hi beisei angin neih theih a ni lo a, entu an awm theih dawn loh bakah ruahmanna awm sa angin kalpui a ni lo. Hengte avang hian refund a
ṭul dawn ni te pawhin a lang.
Premier League club-te hi 2019-22 chhungin broadcaster hnen aṭangin pound tluklehdingawn 9.2 dawng tur an ni a. Premier League chief executive Richard Masters chuan 2019-20 inelna hi zawh theih a nih loh chuan a tlem berah pound tluklehdingawn khat an chan tur thu a sawi.
Neutral venue
League Managers Association chief executive Richard Bevan chuan, "Club-in neutral venue-a khelh an duh lo a nih chuan inelna khelh chhunzawm theih a beiseiawm loh," ti hialin neutral venue chu inelna chhunzawm theihna kawng awmchhun ang deuhin sawi mah se ngaihtuah ṭhat a ṭul dawn.
Watford, Brighton & Hove Albion leh Aston Villa ten mipui hriatah neutral venue-a khelh an duh loh thu an tichiang a, langsara puang chhuak lo zingah pawh neutral venue-a khelh duh lo club an awm.
Neutral venue chungchang hi ngaihtuah nawn a ṭul dawn a, thutawp erawh stadium hman theihna tura phalna petu police leh ground safety official-te kutah a awm ang.
Hmabak
13 May, Nilaini Professional Footballers' Association/League Managers' Association ten medical dan chungchangah member-te an rawn ang.
14 May, Ningani Premier League leh PFA/LMA te medical dan chungchangah an inhmukhawm ang
14 May, Ningani Sports Secretary leh football thuneitute an inbia ang
18 May, Thawhṭanni Premier League meeting neih a ni ang.
18 May, Thawhṭanni Premier League player-te'n social distancing dan zawm siin a hu hoin training an ṭan ang.
25 May, Thawhṭanni UEFA hnuaia ram hrang hrang league-ten inelna an chhunzawm dan tur an tihchianna hun tawp a ni.
1 June, Thawhṭanni Sorkarin England rama inelna hrang hrangte entu awm loa kalpui leh theih hun atana a duan hun a ni.
12 June, Zirtawpni Premier League ṭan leh theih hun atana beisei ni.