Mizorama India national team khelh dan kan ngaihtuah ang - AIFF president

India rama football thuneitu sang ber AIFF president Kalyan Chaubey chuan nimin khan Aijal Club-ah Mizorama football hruaitute leh journalist te kawmna hun a nei a, football hmasawn dan tur chungchang sawi ho a ni.

Kum 45 mi Kalyan Chaubey chuan, “India national team state hrang hranga khelhtir hi a pawimawh a, state tan pawh infuihna ṭha tak a ni thei ang. Chutihrualin India national team hi Mizorama inkhelhtir dawn chuan stadium ṭha a ngai a, an khingpui tur ngaihtuah a ngai bawk. Thil awm theih dan kan zawng ang a, hemi chungchang hi hruaitute nen kan la sawi ho ang,” tiin a sawi.

Kalyan Chaubey hi Tata Football Academy chhuak a ni a, AIFF President kawmnaah hian Tata Football Academy aṭanga inzir chhuak S. Malsawmtluanga, Vanlalrova, Jerry Zirsanga leh Robert Lalthlamuana te bakah India international Jeje Lalpekhlua, Lalrindika Ralte leh Lalchhuanmawia te an tel a. Mizoram Football Association leh a hnuaia District FA hruaitute an kal ṭha hle.

AIFF-ah Mizoram an mikhual tawh lo. MFA honorary secretary Lalnginglova Hmar chu League Committee chairman a ni. Ani bakah hian MFA assistant secretary Lalrawngbawla chu AIFF Referee Committee Member a ni a, MFA Executive Committee Member LV Lalthantluanga, Lalrengpuia leh Hmingthangsanga te chu AIFF hnuaia Finance, Futsal leh Grassroots Committee-ah an tel bawk.

Kalyan Chaubey hi AIFF President awm tawh zinga footballer hlui awmchhun a ni a, India ram football pawh a hrechiang hle. AIFF president Chaubey chuan, “Football hmasawn nan chuan infrastructure-a hma sawn hi a ṭul a, training-na hmu ṭha lehzual neih hi a ngai. Chumi tur chuan hma lak mek a ni a, NorthEast state hrang hrang zingah Mizoram pawh a tel a ni,” tiin a sawi.

India team-a player thlan dan chungchang sawiin Chaubey chuan, “Scouting system chungchangah hian ruahmanna ṭha zawk leh kalphung mumal zawk kan mamawh. Hemi kawngah hian FIFA President nen pawh kan indawr tawh. A thuphungin inremna a awm tawh a, FIFA aiawh Arsene Wenger ten ruahmanna an rawn siam thei a nih chuan hmasawnna hi a awm ngei ka ring,” tiin kalphung thlak tura ruahmanna ṭha a ngaih thu a zawi.

AIFF President hian an hmalakna tur hrang hrang a sawi a, chung zingah chuan Santosh Trophy khelh dan tur ruahmanna thar pawh a tel a ni.

Tu nge Kalyan Chaubey?
1. Kumin September 2, Zirtawpni khan AIFF president thlanna neih a ni a, Kalyan Chaubey hian India football legend Bhaichung Bhutia chu 33-1 in an hneh.
2. Chaubey hian Praful Patel a thlak a, AIFF president chelh thei zinga footballer hlui hmasa ber a ni. President inthlana tel tur hian Gujarat Football Association general secretary Mulrajsinh Chudasama chuan a rawt a, Arunachal Pradesh Football Association secretary Kipa Ajay-a'n a thlawp.
3. Tata Football Academy graduate a ni a, TFA second batch niin kum 1995 khan an inzir chhuak. Kum 1993 khan TFA hian Mizoram an rawn tlawh a, Kalyan Chaubey pawh hi rawn kal telin an player pawimawh chu India captain hlui Renedy Singh a ni.
4. India junior tan a khel a nual a, chung zinga langsar chu U-17 Asian Youth Championship 1994 (Iran) leh U-20 Asian Youth Championship 1996 (South Korea) te an ni.
5. Kum 1996-2006 chhung khan India national team tan a khel a, SAFF Championship-ah pawh ṭum thum a champion.
6. Indian Goalkeeper of the Year ṭum hnih a dawng a, 1997–98 leh 2001–02 season khan chawimawina hi a dawng.
7. Santosh Trophy-ah state panga Goa, Jharkhand, Maharashtra, Punjab leh West Bengal tan a khel tawh a ni.
8. India ram club ṭha Mohun Bagan AC, East Bengal FC, Salgaocar SC, Mahindra United, JCT Phagwara leh Mumbai FC tan te a khel tawh a ni.
9. Ram pawna khelh chhuah tumin kum 2002 khan 2. Bundesliga club Karlsruher SC leh VfR Heilbronn tan trial a nei tawh.
10. Mohun Bagan Academy-ah kum 2010-2013 inkar khan Chief Executive Officer hna a
chelh a ni.