July 4-ah German Cup final

Thawhṭanni khan German Football Association (DFB) chuan German Cup 2020 final khelh hun tur an ti chiang a, knockout inelna hi July 4-ah a hmawr bawkna neih a ni ang.

Bundesliga leh Bundeslige 2 te chu May 16 aṭanga khelh chhunzawm tura tih chian a lo ni tawh. III Division leh hmeichhe football pawh khelh chhunzawm tura tih a ni bawk.

German Cup-ah hian team pali chiah an dam tawh, June 9 leh 10 khian semifinal khelh a ni ang. Bayern Munich leh Eintracht Frankfurt an inkhel ang a, semifinal lehlamah Saarbruecken leh Bayer Leverkusen te an inhmachhawn thung ang.

DFB President Fritz Keller chuan, "Kan duh leh beisei angin sorkar thuneitu lamin thil min tihsak a, an dan leh hrai duan chu kan zawm ve thung tur a ni ang," a ti. German football-ah hian a hmuna entu an awm dawn lo.

Nimin tlai thleng khan German ramah hian Covid-19 kai mi 170,000 an tling tawh a, thi pawh 7,400 chuang an ni tawh. US, Spain, Italy leh UK te ai chuan an tuar nep deuh rih.