Pep leh Man City an kal zel

Tun season Premier League-ah Manchester City-in hneh loh an la tawng lo a, match 13 chhung an chak zawn tawh. Pep Guardiola hote hian Pathianni zanah minute 83-naa David Silva goal hmangin West Ham 2-1 in an lehthal a, league match hnuhnung pathumah minute 80 hnu lamah vek chakna goal an khung. Season ṭan hmaa champion tura rinkai berin champion zia an chhuah zel.

Etihad Stadium-ah Angelo Ogbonna tauh luh hmangin West Ham-in minute 44-naah hma an hruai a, City-in minute 57-naa Nicolas Otamendi hmanga an sut hnuah Spanish midfielder Silva-a'n chakna goal a khung. Inkhel dangah Bournemouth leh Southampton te 1-1 in an inhnehtawk thung.

Beisei pha lo Moyes
David Moyes-a'n Everton hlawh­tling taka a enkawl hnuah Manchester United, Real Socie­dad leh Sunderland te enkawlin beisei a pha lo vek. West Ham United-in team chhan­him tura Moyes an lakluh pawhin suppor­ter zingah lungawi lo an awm a, Scottish manager hnuaiah beisei a san loh vang a ni.

West Ham-in Moyes-a hnuai­ah chak an la nei lo a, Etihad Stadium-ah Ogbonna hmanga goal an khung hmasak avangin an phur hman hle. Hammers tan City laka point hmuh hrim hrim a hlu a, amaherawhchu an goal neih an humhim zawh loh avangin Moyes hnuaia match li an khelh tawhah point li chiah an hlawh chhuak. London club hian match 15 an khelh aṭangin point 10 an hmu a, Sunderland relegate puitu Moyes an kawl avangin an hmabak êng lo hle.

England keeper?
Hammers-in City aṭanga loan hmanga an hawh keeper Joe Hart an chhawr thei lo a, English keeper aia lut Adrian a khel ṭha hle. Spanish keeper Adrian hian first half-ah Silva goal khung tur chu beng per hman a, second half-ah Kevin de Bruyne-a freekick a dang leh bawk. FIFA World Cup-ah Pep Guardiola duh loh Hart hi England number 1 a ni chhunzawm zel ang em tih chu zawhna a ni tawh a, zawhna thar piang erawh Hammers number 1 a ni zel ang em tih a ni.

Inkhel dangah Southampton keeper Fraser Forster-a'n ṭha takin goal a veng a, English kee­per hian minute 42-naa Bour­nemouth tana winger Ryan Fraser goal khungah thiam loh a nei lo. Saints hian minute 61-naah Charlie Austin hmangin an siphurh an sut. Kum 29 mi Forster hi Hart-a hmun chuhpui tur a ni dawn a, Everton keeper Jordan Pickford leh Stoke City keeper Jack Butland te lakah City-a hmun chang lo Joe Hart a fal tawh lo bawk.

City chu...
Pep Guardiola hnuaiah City-in game hmuhnawm an khel a, passing game chu attacking game-ah chantirin team hlauhawm ber zinga mi an ni. Tuna City kan hmuh lai mek hi chu an danglam lehzual a, an thiamna piah lamah an thawhhona a ṭha a, inrintawkna an nei tel bawk.

City boss Pep-a'n squad chhah ṭha tak a nei a, John Stones leh Benjamin Mendy inhliam hnuah pawh Eliaquim Mangala leh Danilo te a luhtir thei a, Spa­nish manager hian a player neih ang a hmang thiam bawk. Aston Villa-a player pawimawh ṭhin Fabian Delph pawhin minute 90 chhung a khel a, West Ham an hneh ṭumin English midfielder ke ding leh vei hmanga ball chawk thei hi City game timawitu zinga mi a ni.

Danglamna thlentu tak erawh player langsar sa bawk an ni a, second half-a lut Gabriel Jesus-a thawhrah sengin Otamendi-a'n an siphurh a sut. Chakna goal pawh player talent nei ṭha bik ke aṭanga chhuak a ni a, Belgian midfielder De Bruyne-a ball vawrhluh fing zet chu Spanish midfielder Silva-a'n invawrh paha ball en ṭhulh chuang si loin a ke vei lamin goal mawi a khung.

Record chu
West Ham-in point 10 chiah an hmu a, an club record-a Premier League match 15 khelh zawha point an hmuh tlem ber ṭum a ni. City erawhin point 43 an hmu tawh a, Premier League bul ṭan ṭha ber an ni chho zel.

Hei chauh hi a la ni lo, City hian English league sang bera Sunderland leh Preston (1891-92), Arsenal (2001-02) leh Chelsea (2016-17) te chak zawn rei record an tluk pha ta bawk. Pep Guardiola hote hi vawi 13 an chak zawn tawh a, record thar nei tumin Pathianni hian Old Trafford-ah Manchester United an tlawh ang.

Manchester City manager Pep Guardiola chuan, "Penalty area-ah player 10 an inhnawh a, goal khung thei loh tluk a ni. Kan tan chuan result lawmawm tak a ni a, second half-a striker pahnih kan dah khan inkhel a tidanglam. Thil thar ka zir belh a, striker pahnihin kan goal nawr a na zawk," tiin a sawi a, United an hmachhawn hunah Sergio Aguero kawppui turin Jesus a lut ve nghal dawn tihna pawh a ni thei ang.

City an ṭha famkim bik lo a, set piece-ah goal an chhuah nasa. Hemi chungchang hi sawiin Pep chuan, "Set piece ven dan kan zir nasa a, amaherawhchu keini aia an len zawk avangin dan a harsa a ni. United kan hmachhawn hunah pawh a danglam dawn lo a, kan khingpuite set piece hmuhtir loh kan tum a ṭul a ni," tiin a sawi.