Bayern Munich mualah PSG

September 27 zan khan Parc des Princes-ah Paris Saint-Germain chuan an mikhual Bayern Munich chu Dani Alves, Edison Cavani leh Ney­mar te goal hmangin 3-0 in an sawp a, Bayern hian Bundesliga nomawi chawipuitu Carlo Ance­lotti an ban zui nghal.

Bayern leh PSG te hian Champions League last 16 an lut chiang tawh a, Paris club hi hmahruaitu an ni chiang tawh bawk. Amaherawhchu, German club hian manager thar Jupp Heynckes an nei tawh a, an ngam loh lakah phuba lak an duh dawn; zanin dar 1:15 hian Allianz Arena-ah an intawng leh ang.

A dang tawh

Italian manager An­celotti chhuah hnuah Ba­yern hi an danglam tawh, German manager Heynckes kaihhruaina hnuaiah an match hma­sa pakua an chak vek a, Borussia Mon­cheng­ladbach hneh lo mah se Pathianni zan khan Hannover an hneh leh tawh a, inrintawkna an nei leh tawh.

Bayern hian hliam vangin Manuel Neuer, Arjen Robben leh Thiago Alcantara te an la chhawr thei dawn lo a, thu lawmawm erawh Thomas Muller a inlan thei tawh, Germany international bakah hian tun hnaiah winger Kingsley Coman a khel ṭha leh hle tawh bawk.

Bayern Munich de­fender Mats Hummels chuan, "Round sang zawk luh kan phu a ni tih lantir nawn nan PSG hi hneh kan duh a ni, beiseina kan nei a, hlauh nei loin kan lo mikhual ang," a ti. Heynckes-a'n hna a thawh ṭan tirh khan Bayern player-te chu an theihna sang ber hmang ṭheuh turin a fuih a, a rah a seng chho mek, zaninah pawh Bayern hian an ti mai mai lo ang.

PSG hlau ru!

Unai Emery enkawlna hnauiah Paris Saint-Germain hian French Ligue 1 lamah an mahni elphaktu an nei rih lo, mahse kawrtawp khan Strasbourg 2-1 in an ngam lo, tun season chhunga league match bika an chak lohna hmasa ber a ni - an rilru hliam dam nan hnehna chan an tum dawn.

Midfielder Thiago Motta bak chu hliam langsar an nei lo a, Edinson Cavani, Kylian Mbappe leh Neymar te tlarhmaah an intlar leh dawn avangin Bayern tlarhnung tan hna a hautak leh dawn, Bundesliga lama tawnhriat nei tawh Julian Draxler an la kawl bawk avangin dan an awlsam lo ang.

French club hian Champions League group match hmasa pangaah khan goal 24 khungin an lamah goal khat chiah a lut a, group stage khel club 32 zingah goal khung hnem ber an nih bakah a chhuah tlem ber an ni bawk.