UCL-a United knockout stage luh zan?

Manchester United-in UEFA Champions League group stage match hnuhnung berah CSKA Moscow an mikhual dawn a, Old Trafford-ah zanin dar 1:35 hian an inhmachhawn ang. Group A inkhel dangah Basel leh point la hmu lo Benfica te an inkhel bawk ang.

Jose Mourinho hote hian point 12 hmu tawh mah se an hnuaia awm Basel leh CSKA ten point 9 ve ve an hmuh avangin tla thei an la ni a, ngaih ṭhat lohna tur erawh a awm tawh lo. United hian an muala Russian club CSKA hi 7-0 an hneh loh chauhin an tla thei a, hemi tur pawh hian Basel-in khualmualah Benfica an hneh a ṭul bawk.

Red Devils hian point an hmuh hrim hrim chuan hmahruaitu an nichiang tawh a, inkhel dangah eng result pawh thleng se an chak lohna zat chu goal li aia a tlem phawt chuan hmahruaitu an ni chiang tawh. Knockout stage lut thei team pathumah Russian club dinhmun a chhe ber a, chutihrualin an hmalam hun an kutah a awm. CSKA hian United hi goal thum tala an hneh chuan Basel-in hnehna pawh chang se point 12 hmu pathum intawn tawhna enkual tur a nih avangin Swiss club hi Europa League khel tur (3-na) zawk an ni.

Portuguese manager Jose Mourinho-a'n Pa­thiannia khelh tur Manchester Derby thir chung­in team a rem a rinawm a, Arsenal nena hnawhchhuah Paul Pogba erawhin Manchester City a hmachhawn dawn loh avangin khelhna hun pek a ni ang. French midifelder hian Manchester United tan Champions League-ah goal a la khung lo a, Juventus tan pawha goal hnih chauh a khung avangin Europe-a club inelna sang bera a record duhawm loh siam ṭhatna remchang a ni thei ang.