Chelsea vs Atletico Spanish club dinhmun a him lo

Premier League champion Chelsea chuan zanin dar 1:15-ah Champions League group match hnuhnung ber khel turin Atletico Madrid an mikhual dawn a, zanin result hian club pahnih hma hun tur a hril thui hle ang.

Chelsea-in last 16 lut chiang tawh mah se knockout round-a team ṭha pumpelh turin pakhatna nichunga a thiam 16 zinga tel a pawimawh a, zanin dar 1:15 veka inkhel tur Roma-in Qarabag an hneh chuan hmahruaitu ni tur chuan Atletico an hneh ngei a ṭul.

Blues-in chak an mamawh aia chak mamawh nasa zawk chu Atletico an ni. Spanish club hian tun hnaiah sulhnu nei ṭha viau mah se tla thei dinhmunah an ding mek–last 16 lut tur chuan Chelsea an hneh ngei ngei a ṭul a, Qarabag-in Roma an hneh sak a ṭul tel bawk.

Thil mak beiseitu

Atletico Madrid tan Champions League last 16 lut turin mahni result piah lamah midang result ngaihven tel a ṭul tawh a, hetichung hian an player pawimawh pahnih Antoine Griezmann leh Filipe Luis chuan thil mak an beisei thu an sawi a, a thiam 16 zinga tel turin beiseina an la nei cheu.

Tun hnaia Atletico tana harhtharna changtu Griezmann chuan, "Kan hmabak chu Chelsea an ni a, theihtawp chhuaha hnehna chang turin kan bei dawn. Chumi tur chuan player pawh kan nei ṭha tawk a ni," a ti a, midang inkhel ngaihtuah loa hnehna an chan phawt a ṭul thu a sawi.

Blues tana lo khel tawh Luis pawhin, "Keimahniah engkim a innghah tawh loh avangin tun season-a kan game harsa ber tur a ni dawn. Football-ah chuan eng thil pawh thleng thei a ni a, thil mak beisei chungin kan bei dawn a ni," a ti.

Hnehna duhtu Conte

Chelsea boss Antonio Conte chuan last 16 lut chiang tawh mah se Atletico laka hnehna chan ngei a duh thu a sawi a, chu chu team tana thil ṭha ber tur a nih thu a sawi tel bawk. Italian manager chuan, "Kan inrintawkna belhchhah turte, kan hmachhawp hlen chhuak tura huaisenna neih belh tur tein hnehna kan chan ngei a ṭul a ni," a ti.

Conte chuan sawi chhun­zawmin, "Atletico Madrid hian team ṭha tak an ni tih he inelnaah hian an lo pholang tawh ṭhin a, chuvangin anni ang team ṭha hneh hi a pawimawh a ni"

"Tlai thei dinhmunah an ding mek tih pawh ka hria a, mah se ṭha taka khelh phawt mai ka duh. Group hmahruaitu nichunga last 16 luh ngei hi ka duh a ni," a ti a, hmahruaitu ni ngei chunga knockout round an lut a nih chuan a nauten inrintawkna an neih belh theih a beisei.